شال: وائس پار بلوچ مسنگ پرسن ( وی بی ایم پی ) ءِ زھرشانی نندانک ءِ شش ھزار روچ ءِ سرجم بوگ ءِ درگت ءَ وی بی ایم پی ءِ چیئرمین نسر اللہ بلوچ ءُ کارگشاد ھوران بلوچ ءَ پریس کانپرنس کرتگ۔
آیانی گوشگ اِنت کہ اے جھان ءِ چہ درساں مسترین ءُ پر ایمنیں زھرشانی گدان اِنت کہ چہ گوستگیں شانزدہ سالاں برجاہ اِنت۔ وی بی ایم پی ءَ اے میان ءَ شال، کراچی، اسلام آباد ءَ ھوار جتائیں شھراں زھرشانی کرتگ، مراگش، ٹرین مارچ ءُ گوستانکی روانک چہ شال ءَ داں اسلام آباد ءَ پیادگ ءَ شتگ ایں، ھزارانی کچ ءَ زور بیگواھیں مردمانی کیس آمیدگس، پہ بیگواھیں مردماں جوڑ بیتگیں کمیشن ءُ بلوچستان سرکار ءَ داتگ۔
آیانی گوشگ اِنت کہ چہ گوستگیں شانزدہ سالاں پرایمنیں جھد ءَ ابید سکا بازیں جنجال کیس، دزگیری، ترسینگ، آزاردھی ءُ بیھارانی دیمپان بیتگ ایں۔ گل ءِ دو کوآرڈینیٹر درکانودی کشگ بیتگ ءُ باز کارکن ھم زور بیگواہ کنگ بیتگ، بلے پد ءَ ھم گل ءَ کدی آزاردھی نہ کرتگ ءُ دیم ءَ ھم نہ کنت۔
آیاں گوشتگ کہ وی بی ایم پی یک در سیاسی ءُ انسانی ھکانی ادارھے ءُ آئی ءِ مول بلوچستان ءَ زوریں بیگواھیانی ھلاس کنگ اِنت۔ آئین ءِ واکداری بہ بیت ءُ پہ شھریانی انساپ ءَ کانودی ھکانی پھازداری کنگ بہ بیت۔
آئی ءَ گوشتگ کہ گل ءِ کار ھمیش اِنت ھمک بیگواھیں مردم ءِ کیس پارم ءِ ھساب ءَ یاداشت کنگ بہ بیت، آ کیس کمیشن، سرکار ءُ ادارھاں دیم دیگ بنت ءُ کھولانی کانود ءِ رد ءَ سروکی کنگ بیت۔ گوں ایشی ھواری ءَ کیسانی دیم ءَ آرگ ءَ پریس کانپرنس ءُ پر ایمنیں زھرشانی کنگ بیت۔
آئی ءَ گوشتگ کہ چہ دراجکشیں جھد ءَ ابید ریاستی ادارہ زوریں بیگواھی ءِ ھلاس کنگ ءُ پہ جیڑہ ءِ گیش ءُ گیوار کنگ ءَ ھچ وڑیں گامگیج زورگ ءَ نہ اَنت۔ ریاستی ادارہ درکانودی کاراں گیش کنگ ءَ اَنت، چہ ایشی سوب ءَ زوریں بیگواھی ءُ درکانودی کوش گیش بوگ ءَ اَنت۔
آئی ءَ گڈی ءَ گوں ریاست ءُ ادارھانی سروکاں لوٹ کرتگ ءُ گوشتگ کہ بلوچستان ءَ زور ءِ چکاسگ بند کنگ بہ بیت ءُ درسیں زور بیگواھیں مردم آجو کنگ بہ بنت۔
