شال: پاکستانی پوج ءِ دست ءَ زور بیگواھیں الی ازگر ءِ زھگ گلام پرید ءَ وتی شنگ کرتگیں درشانے ءَ گوشتگ کہ منی پت ءِ زوریں بیگواھی ءَ بیست ءُ چار سال سرجم بیتگ۔ ما اے بیست ءُ چار سال ءِ میان ءَ گوں پر ایمنی ءَ جھد کنگ ءَ ایں۔
آئی ءَ گوشتگ کہ پہ انساپ ءِ لوٹ ءَ ادارھاں ھوار جتائیں جاھاں وتی پریات برتگ، بلے گوں بژن ءَ گوشگ کپ ایت کہ ھچ جاہ ءَ ڈیھ ءِ ادارھاں پہ انساپ دیگ ءَ ھچ کرد پیلو نہ کرتگ۔ اے پہ پاکستان ءِ درسیں ادارھاں جستے ودی کنت۔
گلام پرید بلوچ ءَ گوشتگ کہ منی پت ءِ زوریں بیگواھی ءَ بیست ءُ چار سال سرجم بیتگ چہ اے دراجکشیں جھد ءَ ابید مارا انساپ دیگ نہ بیتگ چہ ایشی سوب ءَ مئے سرجمیں کھول سسائی جنجالانی آماچ اِنت۔
آئی ءَ گوں سرکار ءُ ڈیھ ءِ ادارھانی سروکاں لوٹ کرتگ کہ زور بیگواھیں مردمانی جیڑہ ءَ گوں انسانی ھمدردی بنیاد ءَ پچار اِت ءُ پہ زوریں بیگواھی ءِ گر ءُ دار ءَ گامگیج بزور اِت۔ گوں منی پت ءَ ھوار پہ درسیں بیگواھیں مردمانی آجوئی ءَ دلجمی دیگ بہ بیت۔
