شال ءَ پہ زور بیگواھیں مردمانی پد جنگ ءَ وائس پار بلوچ مسنگ پرسن ءِ زھرشانی گدان ءَ شال پریس کلب ءِ دیم ءَ 5996 روچ سرجم بیتگ۔
سے شمبے ءَ روچ ءَ وی بی ایم پی ءِ چیئرمین نسر اللہ بلوچ گدان ءَ ساڑی بیتگ ءُ زور بیگواھیں شیرمھمد مری ءِ کھول گدان ءَ اتکگ ءُ آئی کیس گل ءِ کر ءَ یاداشت کرتگ۔ پھیم بلوچ ءَ ھوار جتائیں بھرگاں سیادی داروکیں مردم پہ ھمدردی درشان کنگءَ گدان ءَ اتکگ اَنت۔
زور بیگواھیں شیر مھمد مری ءِ کھول ءِ گوشگ اِنت کہ شیر مھمد مری ء مھمد نور پاکستانی پوج ءَ 15 دسمبر 2024 ءَ چہ اسپین تنگی ءِ چوکی ءَ کھول ءِ دیم ءَ آوار جتگ ءُ چہ گاڑی ءَ ایر کرتگ ءُ برتگ۔ پوج ءَ ھمے گوشتگ کہ جست ءُ پرس ءَ پد یل کنان ئے بلے انگت ءَ شیر مھمد آمیدگس ءَ ھم پیش کنگ نہ بیتگ ءُ آئی بابت ءَ کھول ءَ ھچ وڑیں سرپدی دیگ نہ بیتگ۔
نسر اللہ بلوچ ءَ گوشتگ کہ چہ گل ءِ نیمگ ءَ شیر مھمد مری ءِ کھول دلجمی دیگ بیتگ آئی بیگواھی ءِکیس ءَ پہ زور بیگواھیں مردماں جوڑ بیتگیں کمیشن ءُ سرکار ءَ داتگ ، کمیشن ءَ پہ شیرمھمد ءِ کیس ءَ کانودی کاروائی بندات کرتگ۔
