بلوچ یکجھتی کمیٹی ءِ سروک ڈاکٹر سبیہ بلوچ ءَ وتی شنگ کرتگیں تامربندی کلوھےءَ گوشتگ کہ زوراک وتی زوراکیءَ بلوچستان ءِ ھمک دمگ ءَ تالان کنگ ءَ اِنت ءُ ھمک گس ءَ آس گوارگ ءَ اِنت۔
آئی ءَ گوشتگ کہ بلوچستان ءِ دمگ زھری ءَ داں بیست ءُ پنچ روچ ءَ بند آرگ جنگ بیتگ ءُ ھمے میانءَ جنینءُ زھگاں ھوار باز مردم چہ ڈرون ارش ءُ تیرگواری ءَ کشگ بیتگ۔
ڈاکٹر سبیہ بلوچ ءَ گوشتگ کہ آواران ءَ ھم بلوچ ورنا ھمک ھپتگ ءَ بنجل ءَ لوٹائینگ بنت ءُ آیانی ژانگولیں لاش چگل دیگ بنت۔ مکران ءَ یک ھپتگے ءَ پنچ ورنائیں بلوچ کشندہ ٹولی ءِ دست ءَ بیگواہ کنگ یاکشگ بیتگ اَنت۔
آئی ءَ گوشتگ کہ اے زوراکی تھنا یک لوگے ءِ کسہ نہ اَنت بلکیں سرجمیں بلوچستانءِ کسہ اَنت۔ زوراک بلوچ سرڈگار ءِ سر ءَ بلوچ چکچینی کنگ لوٹ ایت۔ ھما مردم پہ بلوچ ءِ ھکاں گپ کن اَنت پہ آیانی دارگ ءَ وڑ وڑیں پندل سازگ بوگ ءَ اِنت۔ آ بی وائی سی ءِ سروک بہ بنت کہ درکانودی زندانی کنگ بیتگ اَنت یا آدگہ گلانی سنگت بہ بنت آ پورتھ شیڈول ءِ رد ءَ دارگ بوگ ءَ اَنت دانکہ آ بلوچ چکچینی ءِ بگیری ءَ گپ مکن اَنت۔ گڑا مارا اے جیڑھانی سر ءَ بے توار بوگی نہ اِنت ۔
ڈاکٹر سبیہ بلوچ ءَ گوشتگ کہ اگاں مردمے بیگواہ کنگ بیت گڑا آئی کیس دیم ءَ آرگی اِنت ءُ کسے کشگ بیت گڑا آئی لاش دگ ءِ سر ءَ آرگ ءُ زھرشانی کنگی اِنت دانکہ جھان بہ گند ایت مئے گون ءَ چے بوگ ءَ اِنت۔ باید اِنت کہ ما وتی دژمن ءَ گوں تونگری ءَ یل مکن ایں کہ آ مئے گونءَ ھرچی کنگ لوٹ ایت بہ کنت۔
آئی ءَ گوشتگ کہ مئے بے تواری مئے چکچینی ءَ گیشتر توانمند کنت گڑا مارا وتی بے تواری پروشگی اِنت ۔ زوراکیانی ھلاسی گوں مئے توارچست کنگ ءَ بندوک اِنت۔
