شال: دوشی شال ءِ ھند بروری دگ بولان پلازہ ءَ پاکستانی پوج ءَ بیڑ برتگ ءُ این ڈی پی ءِ بنجاھی ڈپٹی آرگنائزر سلمان بلوچ، دلیپ داس ءُ ساھر بلوچ آوار جتگ ءُ بیگواہ کرتگ اَنت۔
آیانی زوریں بیگواھی ءِ گپ نیشنل ڈیموکریٹک پارٹی (این ڈی پی) ءَ راست کرتگ ءُ گوشتگ کہ گل ءِ بجاھی ڈپٹی آرگنائزر سلمان بلوچ ءَ پاکستانی پوج ءَ دوشی ءَ چہ شال ءَ بولان پلازہ ءَ آئی کوٹی ءَ آوار جتگ ءُ بیگواہ کرتگ۔ گوں آئی ھوار دو دگہ مردم دلیپ داس ءُ ساھر بلوچ ءَ ھم آوار جتگ ءُ بیگواہ کرتگ۔ آیانی کوٹی ءِ درسیں سامان پرشت ءُ پروش کرتگ اَنت۔ کتاب ءُ آدگہ گاگد ءُ سامان چگل داتگ اَنت۔
آئی گوشتگ کہ سلمان بلوچ ءِ وڑیں زانتکاریں کارکنانی زوربیگواھی سیاسی لیکہ ءِ میاربار پیش کنگ اِنت۔ اے رویشت نہ تھنا راھبندی ءُ انسانی ھکانی بگیری اِنت بلکیں جمھوری ادارہ ءُ انساپ ءِ بنکی راھبندانی تباہ کنگ اِنت۔ سلمان بلوچ ءِ بیگواھی تھنا ویلے نہ اِنت بلکیں اے ریاستی رویشت ءِ درچ اِنت۔ این ڈی پی ءِ کارکن ءُ آدگہ سیاسی کارکن بازیں وھدے بیت ایشی دیمپانی کنگ بوگ ءَ اَنت۔ چہ ایشی ءَ پیش گل ءِ بنجاھی پتر ءِ دو باسک گنی بلوچ ءُ سنا بلوچ کیتران انگت بیگواہ اَنت۔ کراچی ھنکین ءِ زاھد بلوچ ءُ بارکان ھنکین ءِ سلال بلوچ ءُ میر بلوچ انگت آجو کنگ نہ بوتگ اَنت۔
آئی گوشتگ کہ گل ءِ بنجاھی آرگنائزر شاھزیب بلوچ ایڈوکیٹ ءِ نام پورتھ شیڈول ءَ ھوار کنگ ءُ نوں ڈپٹی آرگنائزر ءِ زوریں بیگواھی ھمے پیش دار ایت کہ این ڈی پی ءِ مھکمیں سیاسی جھد ءِ پہ زور دارگ ءِ جھد کنگ بوگ ءَ اِنت۔ اے گامگیج تھنا سیاسی کارکنانی بگیری ءَ کاروائی نہ بلکیں سیاسی سوچ، گل ءِ رویشت ءُ جمھوری جھد ءَ پروش دیگ ءِ جھد اِنت۔
آئی گوشتگ کہ این ڈی پی تچک ءَ گوش ایت کہ سلمان بلوچ ءُ گوں آئی ھوار بیگواہ کنگ بوتگیں درسیں مردم زوت دیم ءَ آرگ بہ بنت۔ وھدے کانود، راھبند ءُ آمیدگس اَنت گڑا چونیں شھری یے ءِ اے وڑ ءَ زوربیگواہ کنگ یک درکانودی گامگیجے۔ اے رویشت تھنا انسانی ھکانی بگیری نہ بلکیں انساپ ءِ بنیادی راھبندانی لگتمالی اِنت
آئی گوشتگ ما لوٹ کن ایں کہ ریاستی ادارہ اے درکانودی گامگیج ءَ زوت ھلاس بہ کن اَنت۔ درسیں بیگواھیں مردم کانود ءُ آمیدگس ءَ آرگ بہ بنت ءُ سیاسی کارکناں آیانی بنکی ھک دیگ بہ بنت۔
