نیشنل ڈیموکریٹک پارٹی ( این ڈی پی ) ءِ جارکش ءَ وتی شنگ کرتگیں درشانے ءَ گوشتگ کہ بیست ءُ ھشت اکتوبر ءَ چہ بلوچستان سرکار ءِ نیمگ ءَ شنگ بیتگیں نوٹیپکیشن ءِ رد ءَ شست ءُ چار سیاسی ءُ چاگردی کارکنانی نام ناشرکار ءِ گر ءُ داری ءِ ایکٹ 1997 ءِ رد ءَ پورتھ شیڈول ءَ ھوارکنگ بیتگ، اے در راھبندی، درسیاسی ءُ زوراکی یے۔
آئی ءَ گوشتگ کہ اے نوٹیپیکشن ءِ رد ءَ این ڈی پی ءِ بنجاھی سروک شاہ زیب بلوچ ایڈوکیٹ ءَ ھوار بازیں سیاسی کارکنانی نام ھوار اَنت۔ باز بر ءَ چہ سرکار ءِ نیمگ ءَ پہ زانت میاربارانی نام سیاسی کارکنانی لڑا ھوار کرتگ اَنت دانکہ بلوچ ءِ سیاسی جھد بنّام کنگ بہ بیت ءُ مھلوک ءِ تہ ءَ اے کارکنانی کرد شکی بہ بیت۔
آئی ءَ گوشتگ کہ اے گامگیج ھمے راستی ءِ منگ اِنت کہ بلوچستان ءَ سیاسی ءُ جمھوری توانمندانی کار نوں چہ ریاستی زوراکیاں گیشتر توانمند بیتگ۔ وھدے کہ مھلوک ءِ لوٹ مھکم بہ بیت گڑا سرکار پورتھ شیڈول ءُ ناشرکاری ءِ کانودی ءَ کارمرز کنت کہ آ سیاسی مارشت ءَ میاربار پدر کنگ ءِ جھد ءَ کنت۔
آئی ءَ گوشتگ کہ این ڈی پی چہ بنداتی روچاں بلوچستان ءِ مڈیانی لُٹ ءُ پل، زوریں بیگواھی ، انسانی ھکانی لگتمالی، درکانودی کوش ءُ ریاستی زوراکیانی بگیری ءَ پر ایمنیں جھد کنگ ءَ اِنت۔ پارٹی ءِ سروک ءُ کارکن چہ پریس کانپرنس، پر ایمنیں زھرشانی، مراگش ءُ چہ بنجاھی درشانانی پارست ءَ مھلوک ءَ شیوار ءُ مھکم کنگ ءَ اِنت۔
آئی ءَ گوشتگ کہ این ڈی پی اے اے نوٹیپکیشن ءَ بے بنیاد، سیاسی بیرگیری ءُ مھلوک ءِ زانشت ءِ سر ءَ اُرش لیک ایت ءُ ایشی سرجم ءَ رد کنت۔ دیمتر ءَ پارٹی اے پیسلہ ءِ بگیری ءَ درسیں سیاسی، جمھوری ءُ کانودی جنگ ءَ گھگیری کنت۔ بلوچستان ءِ مھلوک ءِ جمھوری ھک، سیاسی آجوئی ءُ پہ گپ جنگ ءِ ھک ءَ این ڈی پی وتی جھد ءَ برجاہ دار ایت، چی ءَ کہ سیاسی زانشت گوں اے وڑیں پندلانی رد ءَ دارگ نہ بیت۔
