بلوچ لبریشن آرمی (بی ایل اے) ءِ جارکش جیھند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں کلات ءِ ھند شیکڑی، مورگند، مکئی ءُ کیسار ءَ سے روچانی تہ ءَ زورگریں پوج ترندیں اُرشاں نشانگ کرتگ ءُ زورگریں پوج ءِ شش کمانڈواں ھوار ھبدہ کارمند کشتگ۔ سرمچاراں زورگریں پوج ءِ کارمندانی سلاہ دستیگ کرتگ اَنت ءُ راشن تباہ کرتگ اَنت۔
آئی گوشتگ کہ بی ایل اے ءِ سرمچاراں پنچ شمبے ءِ روچ ءَ مکئی ءَ زورگریں پاکستانی پوج ءِ پیادگیں کارمند ھما وھد ءَ سنگر گپتگ ءُ نشانگ کرتگ اَنت کہ آ پہ وتی چوکی ءَ راشن برگ ءَ بوتگ اَنت۔
آئی گوشتگ کہ سرمچارانی یک دگہ ٹولی یے ءَ گراپ ءَ زورگریں پاکستانی پوج ءِ چوکی ءُ راشن بروکیں گاڑی نشانگ کرتگ ءُ جانی ءُ مالی تاوان داتگ۔
جارکش ءَ گوشتگ کہ بی ایل اے ءِ سرمچاراں آدینگ ءِ روچ ءَ سھب ءِ ادار پنچ ءِ نزیک ءَ شیکڑی، مورگند ءَ پاکستانی پوج ءِ پیادگیں کارمندانی سر ءَ اُرش کرتگ۔ اُرش جاہ ءَ آتکگیں پوج ءِ گاڑی ھم سرمچاراں سنگر گپتگ ءُ نشانگ کرتگ اَنت۔ چہ ایشی ءَ زورگریں پوج ءَ بازیں کچے ءَ جانی تاوان بوتگ۔
آئی گوشتگ کہ زورگریں پوج ءِ شاہ مردان بنجل ءَ درکپتگیں پیادگیں کارمندانی سر ءَ سرمچاراں اُرش کرتگ۔ اُرش ءَ مرتگیں کارمندانی سلاہ ھم دستیگ کرتگ اَنت کہ اے میڑ داں باز اداراں برجاہ بوتگ۔
آئی گوشتگ کہ جوھان ءُ شاہ مردان ءِ میانی ھند کیسار ءَ بی ایل اے ءِ سرمچارانی یک دگہ ٹولی یے ءَ زورگریں پاکستانی پوج ءِ سے گاڑیانی کاروانے سنگر گپتگ ءَ نشانگ کرتگ کہ اود ءَ زورگریں پوج ءِ شش ایس ایس جی کمانڈو مرتگ ءُ باز ٹپی بوتگ۔ سرمچاراں مرتگیں کمانڈوانی سلاہ ھم دستیگ کرتگ اَنت کہ سلاھاں نائٹ وژن ءُ ترمل اسکوپ ھوار اِنت۔
جارکش ءَ گوشتگ کہ دو روچ ءَ جتائیں ھنداں بوتگیں اُرشاں زورگریں پاکستانی پوج ءِ شش کمانڈو اں ھوار ھبدہ ءَ گیش کارمند کشتگ ءُ باز ٹپی کرتگ۔ مورگند ءَ آدینگ ءِ روچ ءِ سھب ءَ بندات بوتگیں میڑ داں بیگاہ ءَ برجاہ بوتگ کہ اود ءَ پاکستانی پوج ءَ ھیلی کاپٹرانی کمک ھم گوں بوتگ بلے بی ایل اے ءِ سرمچاراں جتائیں ھنداں ٹولیانی دروشم ءَ گوں زورگریں پوج ءَ وتی میڑ برجاہ داشتگ۔
جیھند بلوچ ءَ اے درسیں اُرشانی زمہ واری من اِتگ ءُ گوشتگ کہ دژمن ءِ سر ءَ گیش ترندیں اُرشانی برجاہ دارگ ءِ کول ءَ کن ایں۔ داں بلوچ راج ءِ آجوئی ءَ مئے سلاہ بندیں جھد برجاہ بیت ءُ دژمنیں پوج ءَ ھر نیمگ ءَ بے سوب بیت۔
