بلوچ وومن پورم ءِ سروک ڈاکٹر شلی بلوچ ءَ بلوچ اسٹوڈنٹس ایکشن کمیٹی ءِ چارمی لس دیوانءَ گپ جتگ ءُ بساک ءِ نوک گچین بیتگیں اگدہ دار مراد بات داتگ اَنت ءُ گوشتگ کہ ما مرچی سیاست یا جھد دربرتگ گڑا ھمے نودرانی گلانی برورد اِنت۔ چہ ھمے نودربرانی نیمگءَ مردماں سیاست دربرتگ۔
آئی ءَ گوشتگ کہ مرچی ھمے بساک ءِ دیوانءِ برورد ءَاد ءَ تھنا کیچءِ مردم نہ اَنت بلکیں چہ ڈی جی ھان ءُ جتا جتائیں جاھاں مردم اتکگ ءُ اےدیوان ءَبھر اِش زرتگ۔ اد ءَ گوں بساک ءَ ھوار جتائیں گلانی مردم ساڑی اَنت۔ اے گپ الم نہ اِنت کہ مئے درسانی گل یک بہ بیت۔ ھمے گپ الم اِنت کہ مئے درسانی لیکہ یک بہ بنت۔ وشینءُ ناوشیں جاورانی تہ ءَ مارا یکے دومی ءِ ھمکوپگ بوگی اِنت۔
ڈاکٹر شلی بلوچ ءَ گوشتگ کہ اے دیوان بلوچ زالبولانی نام ءَ کنگ بیتگ گڑامن بلوچ زالبولانی سر ءَ گپ جن آں کہ مرچی بلوچ سیاست ءِ پڑا بلوچ زالبول بنداتی لڑا گندگ بنت۔ اگاں ما بلوچ زالبولانی بابت ءَ جیڑ ایں کہ مارا بانڑی ءِ وڑیں شیرزالانی کرد گندگ ءَ کیت کہ آ جنگانی تہ ءَ بھر زور ایت۔ مارا مائی بیبو ءِ وڑیں زالبول گندگ ءَ کیت کہ جنگ ءِ کمانی ءَ کنت۔
آئی ءَ گوشتگ کہ اگاں ما بلوچ زالبولانی بابت ءَ چاریں کہ آیانی یک مزنیں بھرے گندگ ءَ کیت آیاں سیاست ءَ ھوار جنگاں ھم بھر زرتگ۔ گڑا ما بلوچ زالبول ھما بانڑی ءُ بیبو ءِ پدریچ ایں۔ گوستانک اے گپ ءِ گواہ اِنت کہ زالبول پشت ءَ نہ کنز ایت۔
ڈاکٹر شلی بلوچ ءَ گوشتگ کہ اگاں ما جھان ءِ گوستانک ءَ بوان این ءُ وتی جنز ءَ پچار ایں کہ گڑا ما زان ایں کہ زالبول ءِ چنچو مزنیں کردے ھست اِنت۔ گڑا مارا اے گپ ھم زانگی اِنت کہ ھما کرد ءَ مرد پیلو کرت کنت گڑا زالبول ھم ھما کرد ءَ پیلو کرت کنت۔
آئیءَ گوشتگ کہ مئے اے اھد بانک کریمہ ءِ اھد اِنت مرچیگیں بلوچ زالبولانی جھد ءَ ھوار کنگ ءَ بانک کریمہ ءِ مزنیں کردے ھست اِنت۔
ڈاکٹر شلی بلوچ ءَ گوشتگ کہ باز مردم جھد ءَ پہ جزباتی بنیاد ءَ ھوار بیت ءُ باز پہ زانشتی بنیاد ءَ جھد ءَ ھوار بیت۔ ھما مردم پہ جزباتی بنیاد ءَ ھوار بنت گڑا یک دیوانے ءَ بھر بزور اَنت آیانی سسا ءَ ھمے گپ بیت کہ منی کرد ءُ کار بس ھمیش اِنت ۔ ھما مردم پہ زانشتی بنیاد ءَ جھد ءَ ھوار بنت گڑا آ وت ءَ داں گڈسر ءَ داشت کن اَنت۔
آئی ءَ گوشتگ کہ ریاست مدام سیاسی جھد ءِ دارگ ءِ کوشست ءَ کنت، وڑ وڑیں کیس جنتءُ کھولاں ھم بیھار دنت۔ مرچی ما کیچ ءِ جاہ منندایں مارا پہ کیچ ءَ آھگ ءَ پجار کارڈ لوٹ ایت ما وتی سرڈگار ءِ سر ءَ ھم گوں آجوئی ءَ تر ءُ گرد کرت نہ کن ایں۔
