ھزدار: پاکستانی پوج ءِ دست ءَ زوربیگواہ کرتگیں ممتاز بلوچ ءُ اسمائیل جتک ءِ کھول ءَ پہ آیانی آجوئی ءَ توار چست کنگ ءِ لوٹ کرتگ۔
کھول ءِ گوشگ اِنت کہ ممتاز بلوچ ءَ پاکستانی پوج ءَ 6 ستمبر 2022 ءَ چہ ھزدار ءَ سیمی رند ءَ آوار جتگ ءُ بیگواہ کرتگ کہ انگت ءَ بیگواہ اِنت۔ ما پہ آئی آجوئی ءَ ھندی مسترانی کر ءَ شتگ ایں ءُ درسیں در ٹک اِتگ اَنت۔
آئی گوشگ اِنت کہ ما مدام چہ ھندی مسترانی نیمگ ءَ دلبڈی دیگ بوتگ ایں کہ ممتاز بلوچ زوت آجو بیت بلے آئی بیگواھی ءَ 3 سال گوستگ انگت ءَ آئی ھچ وڑیں ھال نیست۔ ممتاز بلوچ ءِ مات مدام ھمے ودار ءَ بوتگ کہ منی زھگ زوت آجو بیت من آئی ءَ گنداں بلے آئی مات ءَ وتی زھگ ءِ زوریں بیگواھی ءِ گرانیں گم نہ سگ اِت ءُ بیران بوتگ۔
کھول ءِ گوشگ اِنت ما پہ ممتاز بلوچ ءِ آجوئی ءَ ودار ءَ اَت ایں کہ چہ آئی آجوئی ءَ ابید ممتاز ءِ زامات اسمائیل جتک ھم آوار جنگ ءُ بیگواہ کنگ بوت۔ چہ اسمائیل ءِ بیگواھی ءَ مئے گم ءُ ترس گیشتر بوتگ اَنت۔
کھول ءَ گوں بلوچ راج ءُ انسانی ھکانی کارکناں لوٹ کرتگ کہ آ پہ ممتاز بلوچ ءُ اسمائیل جتک ءِ آجوئی ءَ توار چست بہ کن اَنت۔
