تربت: بلوچ وومن پورم ءِ سروک ڈاکٹر شلی بلوچ چہ بلوچستان سرکار ءِ نیمگ ءَ نامانی پورتھ شیڈول ءَ ھوار کنگ ءِ بابت ءَ مرچی سی ٹی ڈی تانہ ءَ پیش بیتگ۔
آئی ءَ پیشی ءَ پد گوں اھوالکاراں تران کرتگ ءُ گوشتگ کہ چہ ایشی ءَ پیش ھم منی نام ءَ ایپ آئی آر کنگ بیتگ من آمیدگس ءَ پیش بیتگ آنءُ نوں منی نام پورتھ شیڈول ءَ ھوار کنگ بیتگ کہ اے یک درکانودی ھیلھے۔
آئی ءَ گوشتگ کہ سرکار ءَ پہ مئے وڑیں کارکناں زمین تنگ کرتگ ءُ نوں پہ تر ءُ گرد کنگ ءَ ھم این او سی ءِ لوٹ ایت۔ یکشل ءَ بیھار دیگ ءُ گساں بیڑ برگ ءِ ھواری ءَ منی کھول ھم زور دیگ بوگ ءَ اِنت۔
ڈاکٹر شلی بلوچ ءَ گوشتگ کہ تھنا منی نام پورتھ شیڈول ءَ ھوار کنگ نہ بیتگ دگہ باز مردم کہ آیانی تہ ءَ مرد ءُ جنین ھم ھوار اَنت۔ من کانود ءِ رد ءَوتی ءُ پہ آدگہ مردمانی بنکی ھکاں توار چست کن آنءُ کانود ءِ لوٹانی رد ءَگوں اے جاوراں دیم پہ دیمی کن آں۔
آئی ءَ پرویز مشرپ ءِ مسال داتگ ءُ گوشتگ کہ آئی زوراکیاں مئے سروکانی توکل پروش دات نہ کرتگ گڑا مرچیگیں جاور ھم مارا داشت نہ کن اَنت۔ ما آمیدگس ءَ رویں ءُ کانود ءِ ھساب ءَ کیس کن ایں۔
ڈاکٹر شلی بلوچ ءَ گوشتگ کہ بلوچ وومن پورم پہ جنین ءُ سانمندیں کھولانی ھک ءَ پر ایمن ءُ راھبند ءِ بنیاد ءَ جھد کنگ ءَ اِنت، گڑا سرکار چہ آیانی توار ءِ دارگ ءَ ابید گپاں گوش بدار ایت ءُ پہ آیانی پھریزگ ءَ دلجمی بہ دنت۔
*
