بلوچستان لبریشن پرنٹ (بی ایل ایپ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں 24 اکتوبر ءِ سھب ءِ ادار دہ ءِ نزیک ءَ آواران ءِ ھند نوندڑہ بریت ءَ زورگریں پاکستانی پوج ءِ سر ءَ اُرش کرتگ۔ اُرش ءِ آسر ءَ پاکستانی پوج ءِ چار کارمند جاھی مرتگ ءُ باز ٹپی بوتگ۔ سرمچاراں داں یک ادارے ءِ میڑ ءَ مرتگیں کارمندانی سلاہ دستیگ کرتگ اَنت۔
آئی گوشتگ کہ اے اُرش ءَ سرمچاراں بنداتءَ بنجل ءِ نزیک ءَ تر ءُ گرد کنوکیں چار کارمند نشانگ کرتگ اَنت۔ پہ آیانی کمک ءَ بکتر بند گاڑی آتکگ سرمچاراں بکتر بند گاڑی ترندیں اُرش ءَ نشانگ کرتگ کہ بکتر بند ءَ باز تاوان بوتگ۔ سرمچاراں بنجل ءِ جتگیں کیمرھاں ھوار کواڈ کاپٹر ھم نشانگ کرتگ ءُ تاوان داتگ ءُ کاروائی ءَ پد پہ سلامتی درکپتگ ءُ وتی بندراں شتگ اَنت۔
جارکش ءَ گوشتگ کہ بی ایل ایپ ءِ سرمچاراں 23 اکتوبر ءَ نال ءُ ھزدار ءَ روکیں سی پیک شھدگ جتائیں ھنداں داں سے اداراں بستگ ءُ پٹ ءُ پول کرتگ۔ ھمے میان ءَ سرمچارانی یک دگہ ٹولی یے ءَ نال ءَ پولیس تانہ ءِ سر ءَ اُرش کرتگ ءُ کارمند دزگیر کرتگ ءُ جست ءُ پرس ءَ پد آ یل داتگ اَنت بلے تانہ ءَ ایریں سرکاری مشینری ءُ لھتیں گاڑی مانداشتگ اَنت۔
آئی گوشتگ کہ سرمچاراں نال کلیڑی ءَ بندساچی شرکت ءِ سر ءَ اُرش کرتگ ءُ آئی مشین ءُ سامان تاوان داتگ ءُ شرکت ءَ کار کنوکیں درسیں کارمند دزگیر کرتگ اَنت کہ آ گل ءِ کر ءَ بندیگ اَنت ءُ چہ آیاں جست ءُ پرس برجاہ اِنت۔
آئی گوشتگ کہ سرمچاراں یک دگہ کاروائی یے ءَ مستونگ ءِ ھند کڈکوچگ ءَ بلوچستان ءِ مڈیانی لٹ ءُ پل کنگ ءُ بروکیں گاڑی اُرش ءَ نشانگ کرتگ اَنت۔
میجر گھرام بلوچ ءَ آواران ءَ چار کارمندانی کوش ءُ نال ءُ کڈکوچگ کاروائیانی زمہ واری من اتگ ءُ گوشتگ کہ داں بلوچستان ءِ آجوئی ءَ زورگریں پاکستانی پوج ءُ آئی شوربندیاں ھواریں شرکت آں نشانگ کنگ ءِ کول ءَ کن ایں۔
