شال ءَ زور بیگواھیں وھاب بلوچ ءُ نزیر اھمد بلوچ ءِ کھول ءِ نیمگ ءَ شال پریس کلب ءِ دیم ءَ پہ آیانی زوریں بیگواھی ءِ بگیری ءَ زھرشانی کنگ بیتگ۔
زھرشانی ءَ زور بیگواھیں مردمانی کھول، جنین ءُ زھگ، سیاسی کارکن ءُ نودربراں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔ زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بیتگ کہ آیاں درسیں بیگواھیں مردمانی آجوئی ءِ لوٹ کرتگ۔
زھرشانی کنوکیں مردمانی گوشگ اِنت کہ وھاب بلوچ ءُ نزیر اھمد بلوچ 17 اکتوبر 2025 ءَ شال ءِ ایسا نگری ءَ چہ کوٹی ءَ ریاستی ادارھانی دست ءَ آوار جنگ ءُ بیگواہ کنگ بیتگ اَنت کہ انگت ءَ آیانی ھچ وڑیں ھال نیست۔
آیانی گوشگ اِنت کہ مئے زھگانی سر ءَ چونیں بھتامے ھست گڑا آمیدگ ءَ آرگ ءُ پیش کنگ بہ بنت، اگاں بے میار اَنت گڑا زوت یل کن بنت۔
چوش کہ کھول ءِ نیمگ ءَ زھرشانی ءِ جار ءَ پد مرچی سھب ءَ پولیس بازیں کچے ءَ آتکگ ءُ مچ بیتگ اَنت۔ چہ پولیس ءِ نیمگ ءَ ترسینگ ءَ ابید ھم کھولاں زھرشانی کرتگ۔
