بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ بلوچستان ءِ تھی کارانی تک ءِ نیمگ ءَ شنگ بیتگیں نوکیں جار ءَ منی نام، نازگل ءُ سید بی بی ءِ نام ھوار کنگ بیتگ اَنت۔ پہ انسانی ھکاں چست بیتگیں توارانی دارگ نوکیں گپے نہ اِنت بلکیں کوھنیں کوشستے۔ایشی مول نہ تھنا لس مھلوک ءِ ھکانی پُلگ اِنت بلکیں ھما توارانی دارگ اِنت کہ آ زوراکیانی بگیری ءَ چست بیتگ اَنت۔ بلے ھمک وھد ءَ ایشی آسر رد بیتگ۔ چونیں ھم ریاستے آ توار ءَ داشت نہ کنت کہ آئی ءَ مھلوک ءِ پلہ مرزی گوں بہ بیت۔
آئی ءَ گوشتگ کہ اے بنداتی جھد نہ اِنت بلکیں چہ ایشی ءَ پیش ھم من ءُ منی آدگہ سنگتانی بگیری ءَ دروگیں ارزی نبیسگ بیتگ۔ نہ تھنا اے بلکیں ما چہ ریاستی ادارھانی نیمگ ءَ یکشل ءَ بیھار دیگ بیتگ ایں۔ من سرپد آں کہ اے نوکیں پورتھ شیڈول ھم ھمے بیھار ءُ زوراکیانی درچ اِنت۔ بلے اے وڑیں گامگیج مئے وڑیں سیاسی کارکناں گیش مھکم کنت ءُ مارا گوں بلوچ مھلوک ءُ گوں آئی مول ءَ گیشتر گوں مھکمی ءَ ھمگرنچ کنت۔
ڈاکٹر شلی بلوچ ءَ گوشتگ کہ ما مدام آئین ءُ کانود ءِ رد ءَ جھد کرتگ ءُ دروگیں بھتامانی بگیری ءَ کانود ءِ ھمک بھرگ ءَ کار گرایں۔ اے وڑیں کاروائی مئے توکل ءَ گیشتر مھکم کنت ءُ کار کنگ ءِ سکین ءَ دنت۔ مارا مدام مئے مھلوک ءِ کمک گوں اِنت ءُ ھمے مئے زور اِنت، ما ایشی گیشتر مھکم کن ایں۔
