بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ ساکب بزدار ءِ زوریں بیگواھی انسانیت، کانود ءُ انساپ ءِ لگتمالی اِنت۔ 27 اگست 2025 ءَ چہ شال ءَ ساکب بزادار ءِ زوریں بیگواھی تھنا یک مردمے ءِ بنکی ھکانی لگتمالی نہ اِنت بلکیں اے ریاست ءِ ھما رویشت ءَ پیش دار ایت کہ چہ سالاں بلوچانی گون ءَ برجاہ اِنت۔ آئی چماں ھمک بلوچ شکی اِنت۔ اے مارشت نہ تھنا گوں ھندی مردمانی گون ءَ زوراکی یے بلکیں بلوچ راج ءِ مچی پجار ءُ ھستمان ءِ سر ءَ ارشے زانگ بیت۔
آئی ءَ گوشتگ کہ ساکب بزدار پنجاپ یونیورسٹی لاھور ءِ نودربرے ءُ انوں روزگار ءِ شوھازگ ءَ بیتگ۔ بلے آئی زوریں بیگواھی ھمے چیز ءَ پدر کنت کہ مرچی وانندگیں بلوچ ورنا چہ وتی جھد ءُ زانشت ءَ ابید وتی سرڈگار ءِ سر ءَ پھریز نہ اَنت۔
ڈاکٹر شلی بلوچ ءَ گوشتگ کہ ما گوں ریاستی ادارھاں لوٹ کن ایں کہ ساکب بزدار زوت دیم ءَ آرگ ءُ آئی زوریں بیگواھی ءَ ھواریں میاربار کانود ءِ رد ءَ جست گرگ بہ بنت۔ ریاستی ادارہ ءُ اسمبلی زوریں بیگواھی ءَ نیمونے دیگ ءِ جھد ءَ بیتگ اَنت بلے آ مدام بے سوب بیتگ اَنت۔ اے زوراکی زی ھم منگ نہ بیتگ ءُ دیم ءَ ھم نہ بیت۔
آئی ءَ گوشتگ کہ ساکب ءَ ھوار درسیں بیگواھیں بلوچ زوت آجو کنگ بہ بنت، اے پہ کانود ءُ انساپ ءَ جوانیں گامگیجے۔
