بلوچ نیشنل موومنٹ ( بی این ایم )ءِ انسانی ھکانی ادارہ پانک ءَ وتی شنگ کرتگیں درشانے ءَ گوشتگ کہ دو بلوچ ورنا وھاب بلوچ ء ازیز جاہ منند سردشت پسنی ءُ نزیر بلوچ ء شاہ مھمد اسپلنجی مستونگ ءِ جاہ منند 16 ءُ 17 اکتوبر ءِ میانی شپ ءَ پاکستانی پوج ءَ آوار جتگ ءُ بیگواہ کرتگ اَنت۔
آئی ءَ گوشتگ کہ وھاب بلوچ ایپ ایس ءِ نودربرے ءُ پہ شریں زانشتے ءِ دربرگ ءَ بلوچستان ءِ بنجاھی شھر شال ءَ اتکگ۔ نزیر بلوچ شال ءَ درسرکاری نادراھجاہ ءِ نرسنگ کالج ءِ بی ایس ءِ بنداتی سمسٹر ءِ نودربرے۔
آئی ءَ گوشتگ کہ بژنی گپ ایش اِنت کہ پاکستانی ریاستی ادارھانی نیمگ ءَ بلوچ نودربرانی زوریں بیگواھی ءِ وڑیں ٹوھیں میارباری ءِ رد ءَ نشانگ کنگ ءِ ویل گیش کنگ بیتگ۔ انوگیں روچاں ھمک روچ چہ بلوچستان ءَ الم ورنا بزاں نودربرانی زوریں بیگواھی ءِ ھالے سر بیت کہ آئی ءَ ریاستی ادارھاں آوار جنگ ءَ پد بیگواہ کرتگ ءُ آیانی بابت ءَ کھول نہ زانت کہ چون ءُ کج ءَ اَنت۔
آئی ءَ گوشتگ پانک اے وڑیں زوراکی ءُ درکانودی آوار جنی ءَ گوں ترندیں دانکاں ایر جنت ءُ دوئیں بلوچ ورنایانی زوتیں آجوئی ءِ لوٹ ءَ کنت۔
