بلوچ نیشنل موومنٹ ( بی این ایم ) ءَ ھزدارءِ ھند زھری ءَ پاکستانی پوج ءِ زوراکیانی بابت ءَ وتی شنگ کرتگیں پنتاکے ءَ گوشتگ کہ پاکستانی پوج ءَ ماھے بیت کہ چہ زمین ءُ آسمان ءَ ھزدار ءِ ھند ’ زھری ‘ ءَ بیڑ آرگ ءَ اِنت۔
آئی ءَ گوشتگ کہ ستمبر 2025 ءِ میانی روچاں پاکستانی پوج ءَ پہ بلوچ راجی زْرمبشت ءِ پروش ءَ اے ھلک ءُ میتگاں لشکرکشی بنا کرتگ۔زھری دیر اِنت کہ بلوچ راجی آجوئی زْرمبشت ءُ راجدوستیں سیاست ءِ بنجل اِنت۔ اے سری رند نہ اِنت اے دمگ زوراکیانی دیمپان اِنت— چہ ایشی ءَ پیش ھم پاکستانی پوج ءُ آئی ءِ کاسگ چٹاں اد ءَ کشت ءُ کوش کرتگ ، مردم زور بیگواہ کرتگ اَنت ، سدانی کچ ءَ آوار جنگ ءَ پد در آمیدگسی کشتگ ءُ بے کس ءُ مردم کل کرتگ اَنت۔
آئی ءَ گوشتگ کہ اے میار چہ کس ءَ چیر نہ اَنت۔ پاکستانی واکدار، پاکستانی رسانک ءُ وت پاکستانی پوج ءِ جھگیراں اے زوراکی ءُ کشت ءُ کوش من اتگ اَنت۔ انی ھم چہ ایشی ءَ گیشتر کشتگ اش بلے پاکستانی پوج ءَ ھمے اکتوبر 2025 ءَ ماں زھری ءَ کم کم ءَ چاردہ مردمانی کوش من اتگ۔
آئی ءَ گوشتگ کہ اے زوراکی ءُ کشت ءُ کوش ءِ روا دیگ ءَ پاکستانی لشکر ’ فتنہ الھندستان ‘ ءُ ’ فتنہ الخوارج ‘ رنگیں دینی ءُ سیاسی پنام کارمرد کنت — داں پنجاپیاں گمراہ بہ کنت ءُ آیانی دلانی تہ ءَ کینگ ءُ بیرگری ءِ مارشت ودی بہ کنت۔ پاکستانی لشکر لوٹ ایت کہ بلوچ راج ءِ بگیری ءَ پاکستانی پوج ءِ چکچینی ءِ کارپداں پنجاپی پلہ مرزی بہ کن اَنت ، پمیشکا چوشیں دانک ءُ گپ شکسائیت۔ اے زورگریں لشکر ءِ ’ روشت ءُ کارداب ‘ اِنت کہ چیردستیں راجانی سیاسی ءُ مردمی ھکانی لپاشگ ءَ پد آیاں گوں ڈنی دژمناں ھمگرنچ کنگ ءِ کوشست کنت۔
آئی ءَ گوشتگ کہ تراسانی ءِ نزیک ءَ پاکستان ءِ ڈرون ارشاں ثناء اللہ ءِ لوگ بانک چل سالی ئیں آمنہ ، الی اکبر ءِ لوگ بانک لال بی بی ءُ سی سالی ئیں مھمد ھسن ء مھمد یاکوب بیران بوتگ اَنت ، چہ ایشاں ابید باز ٹپی بوتگ۔ پاکستانی پوج ءَ وت ھم اے ارش من اتگ۔
آئی ءَ گوشتگ کہ زھری ءِ دمگ مولاچاڑی ءَ پاکستانی پوج ءَ گوں تیرگواریں بالگرداں میتگ ءِ سر ءَ ارش کرتگ، چہ ادارے ءَ گیش تیرگواری کرتگ، اے ارش ءَ ’ چار چک ، جنین ءُ مردینے ‘ بیران بوتگ اَنت۔
آئی ءَ گوشتگ کہ بلوچ نیشنل موومنٹ( بی این ایم ) راجانی سنت ، مردمی ھکانی گل ءُ چہ راجمستری منوکیں ڈیھاں دزبندی کنت کہ آ ماں بلوچستان ءَ جنگی میار ءُ مردمی ھکانی مزنیں بگیریانی سر ءَ دلگوش گْور بہ کن اَنت۔
آئی ءَ گوشتگ کہ پاکستان ناشرکاریں ریاستے کہ بلوچ ءُ دگہ چیردستیں راجانی گواجناں پل ایت۔آ بلوچستان ءِ پر ارزشتیں زمین ءُ مڈیاں میان راجی تک ءَ پہ وتی سیاسی ءُ گزرانکی سیتاں بھا کنت— پمیشکا روکپتی توان پاکستانی جرنیل ءُ سیاستدانانی میارانی سر ءَ ترک ءُ نک اَنت ۔ مردمگری ءِ باندات ءَ اے ڈالچاری نی باید آسر بہ بیت۔
آئی ءَ گوشتگ کہ بلوچستان ءِ آجوئی ناں ایوک ءَ پہ بلوچ راج ءِ مانشت ءُ مڑاہ ءَ المی اِنت بلکیں پہ دمگ ءُ جھانی ایمنی ءُ داشت ءَ ھم المی اِنت۔
