اوگانستان ءِ تالبان سرکار ءِ جارکش زبی اللہ مجاھد ءَ وتی شنگ کرتگیں درشانے ءَ گوشتگ کہ مرچی سھب ءَ پاکستانی پوج ءَ کندھار ءِ دمگ اسپین بولدک ءَ گوں مزنیں سلاھاں اُرش کرتگ کہ ایشی آسر ءَ دوازدہ لس شھری بیران ءُ سد ءَ گیش ٹپی بیتگ۔
آئی ءَ گوشتگ کہ اوگان پوج ءِ پسھی کاروائی ءَ بازیں چوکی ءُ بنجل دستیگ کرتگ، سلاہ ءُ ٹینکر ھم برتگ اَنت۔ پاکستانی پوج ءِ بازیں شوربندی تباہ کرتگ۔
زبی اللہ مجاھد ءَ گوشتگ کہ مئے توکل مھکم اِنت ما پہ وتی سرڈگار ءُ لس مردمانی پھریزگ ءَ جاڑیگ ایں۔
اوگانستان ءُ ایرانی رسانکدر ءِ رد ءَ پاکستانی پوج ءَ دوشی بلوچستان ءِ سیمسر ءَ برابچہ ءِ نزیک ءَ ھپت اوگان شھری دزگیر کنگ ءَ پد تیرگواری کرتگ ءُ کشتگ ۔
چوش کہ یازدہ اکتوبر ءَ اوگانستان ءِ پوج ءَ سیمسر ءَ پاکستانی پوج ءِ سر ءَ اُرش ءَ پاکستان ءِ 58 پوجی مرتگ ءُ 30 ٹپی بیتگ اَت۔
اے بابت ءَ اوگانستان ءِ تالبان سرکار ءِ جارکش زبی اللہ مجاھد ءَ پریس کانپرنس کرتگ ءُ گوشتگ اَت کہ پاکستان ءِ نیمگ ءَ اوگانستان ءِ سر ءَ ارش ءِ پسہ ءَ کاروائی کرتگ ءُ پاکستان ءِ 58 پوجی کشتگ ءُ 30 ٹپی کرتگ۔ پاکستان ءِ بیست چوکی دستیگ کرتگ ءُ جنگ ءِ ھلاسی ءَ پد واتر بیتگ ایں۔
