شال: درسرکاری نادراھجاہ ءَ ایریں بیست لاش بے کس لیکگ ءُ دشت ءَ تیرہ میل کبرستان ءَ کل کنگ بوتگ اَنت۔
اھوالکار ءِ رد ءَ لاشانی کل کنگ ءَ سرکاری ادارھانی کارمند ءُ چیپا پاؤنڈیشن ءِ کارکن گوں بوتگ اَنت۔
چہ کل کنگ بوتگیں لاشاں چار لاش چہ منگچر ءَ آرگ بوتگ اَنت۔ آیانی نام گل ھان پنام یاسین، انایت اللہ، ازت اللہ ءُ شئے مراد اِنت۔
سرکار ءِ گوشگ انت کہ کل کنگ بوتگیں لاش سلاہ بندیں مردمانی اَنت کہ آ جتائیں کاروائیاں جنگ بوتگ اَنت۔ آیانی تہ ءَ شال ءَ پوج ءِ ھیڈکوارٹر ءَ اُرش ءَ جنگ بوتگیں سلاہ بندیں مردمانی لاش ھم ھوار انت۔
چوش کہ چہ منگچر ءَ آرتگیں لاش بی ایل اے ءِ سنگت اَنت کہ آیانی بابت ءَ بی ایل اے ءِ جارکش آزاد بلوچ ءَ ھم وتی درشان ءَ آیان ءَ ستک شانی ندر کرتگ اَت۔
آزاد بلوچ ءِ رد ءَ گل ھان پنام یاسین، انایت اللہ پنام ھاپز، ازت اللہ پنام سئید ءُ شئے مراد پنام سلام 2023 ءَ گل ءَ ھوار بوتگ اَنت ءُ شاکر نامیں مردمے ءِ گون ءَ میڑ ءَ شھید بیتگ اَنت۔
