بلوچ آجوئی لوٹوکیں رھشون ءُ بی ایل ایپ ءِ سروک ڈاکٹر اللہ نزر بلوچ ءَ وتی شنگ کرتگیں تواربندی کلوھے ءَ گوشتگ کہ جھان ءِ چونیں توانمندے ءَ چونیں ھم راجے ءَ آجوئی ءُ وتواکی ءِ پرواہ نیست دانکہ آ راج پہ وتی سرڈگار ءِ آجوئی ءَ گوں مھکمی ءَ مہ اوشت ایت۔
آئی ءَ گوشتگ کہ مرچی لکانی کچ ءَ بلوچ پہ وتی سرڈگار ءِ آجوئی ءُ دیمپانی ءَ شھید بیتگ یا زور بیگواہ اَنت۔ لکانی کچ ءَ مردم درانڈیھی زندگی گوازینگ ءَ اَنت ءُ لکانی کچ ءَ مردم بلوچستان ءَ بے گس اَنت۔
ڈاکٹر اللہ نزر بلوچ ءَ گوشتگ کہ من یک ڈاکٹرے ءِ بستار ءَ ھمے گوش آں کہ جنین ءُ مردیں پہ زانت ءُ کار ءَ برابر اَنت۔ من بلوچ جنیناں ھم سلام پیش کن آں کہ اے گھار ءُ زھگ پہ آجوئی ءُ انسانی ھکاں مزنیں دیمونی دیگ ءَ اَنت۔ من وتی گھار ءُ زھگاں گوشگ لوٹ آں کہ شما توپک چست بہ کن اِت۔ چی ءَ کہ شما ھم راج ءِ پنجاہ درسد بھر اِنت شما ھم توپک چست کرت کن اِت۔ دژمن توپک ءِ توار ءَ ابید دگہ ھچ ءَ سرپد نہ بیت۔
آئی ءَ گوشتگ کہ من گوں وتی لس مھلوک ءَ لوٹ کن آں کہ چونیں ھم بلوچ جھدکارے اگاں آ گھارے، براسے، کماش یا ورنایے شمئے کِر ءَ کیت آئی کمک ءَ بہ کن اِت۔
ڈاکٹر اللہ نزر بلوچ ءَ گوشتگ کی من گوں وتی جھدکاراں لوٹ کن آں کہ آ یک سرجمیں پوجے جوڑ بہ بنت۔ ما گوں یک انچیں دردے ءَ گوزگ ءَ ایں کہ مرگ مئے ھمراہ اِنت۔ اگاں مئے سر ءَ بمب ارش بہ بیت یا تیرگواری، بلوچ کج ءَ کہ ھست آ پھریز نہ اِنت۔
آئی ءَ گوشتگ کہ مرچی پشتون، سندی، گلگت بلتستان ءُ پاکستان ءِ زورگپتیں کمشریاں ھم گوشگ لوٹ آں کہ بیا اِت آجوئی جھد ءَ ھوار بہ بہ اِت۔ بلوچ راج گوں شما اوشتاتگ۔
