اسلام آباد: بلوچ یکجھتی کمیٹی ءِ نیمگ ءَ اسلام آباد پریس کلب ءِ دیم ءَ برجاھیں زھرشانی نندانک ءَ ڈاکٹر ماہ رنگ ءَ پریس کانپریس کرتگ ءُ گوشتگ کہ ما چہ اسلام آباد ءَ واتر بلوچستان ءَ رویں گڑا وتی سر ءَ بوتگیں زوراکیانی کسہ ءَ بلوچستان ءِ گس گس ءَ سر کن ایں۔ ما ریاست ءِ رستری شوندات ءُ رویشتاں لّس مردمانی آمیدگس ءَ پیش کن ایں۔ ما اسلام آباد ءُ آئی ادارھانی گپ ءُ رزوائیاں نبشتہ کن ایں دانکہ آیانی آؤکیں پدیچ چہ آیانی کارپداں ملامت بیت۔
آئی ءَ گوشتگ کہ بلوچ ماتانی گون ءَ ایشانی رویشت، بدیں کارپد ءُ زوراکیانی کسھاں کار ایں۔ اے دردناکیں کسہ ءَ بلوچ ءِ گس گس ءَ سر کن ایں۔ اے زوراکیانی کسھاں لولیانی دروشم ءَ داں وتی آؤکیں پدریچاں سر کناں بہ ایں۔ اے بلوچ ماتاں چہ اسلام آباد ءِ نیمگ ءَ ابید دلرنجی ءَ دگہ ھچ نہ رستگ۔
ڈاکٹر ماہ رنگ ءَ گوشتگ کہ چہ درساں بے اوستیں گپ ایش اِنت کہ اے وھد ءَ ریاست ءِ درسیں بھرگ آمیدگس ءَ بگر داں رسانکدر ءَ درس مئے بگیری ءَ بوتگ اَنت۔ ریاست ءِ پھازداریں ادارھاں مارا لٹ شاپ کرتگ، ریاست ءِ آمیدگس میارباریں دروشمے ءَ بے توار بوتگ ءُ رسانکدر ءَ زوراکیانی چیر دیگ ءِ جھد کرتگ مئے بگیری ءَ کمپین کرتگ۔
آئی ءَ گوشتگ کہ ریاست ءِ ٹولیانی کارمنداں مارا زاہ ءُ بیھار داتگ، وتگڑیں زانوگراں مئے گوں کینگداری رویشت پیش داشتگ ءُ ریاستی زوراکی گیش کمک کرتگ، ما وتی راستی ءِ سر ءَ اوشتاتگیں۔ ریاست ءَ دروگ ءُ پندل ءِ ھواری ءَ بے سوبیں جھد ھم کرتگ۔
ڈاکٹر ماہ رنگ ءَ گوشتگ کہ مئے زرمبشت ءَ مردمانی کمک ءُ پلہ مرزی گون اِنت، چہ لس مردمانی کمک ءَ برجاھیں زرمبشت گوں زور ءُ زوراکیاں ھلاس نہ بیت۔ مئے زھرشانی ءِ میان ءَ ریاستی پھازداریں ادارھانی نیمگ ءَ مئے کودکیں زھگ، کماش ءُ جنینانی گون ءَ زوراکی کنگ بوتگ اے زوراکی کدی شموشگ نہ بیت۔ اگاں میان استمان بزاں اکوام متھدہ ءُ یورپی یونین ءِ وڑیں مردمی ھکانی گل بلوچستان ءَ بیوکیں زوراکیانی سر ءَ وتی چمان بند بہ کن اَنت پہ مردمگری ءَ مزنیں تباھی یے بیت۔
آئی ءَ گوشتگ کہ ریاست، آمیدگس، رسانکدر، سرکاری ٹولی، وتگڑیں اھوالکار ءُ دانشورانی بلوچ دُژمنیں رویشت دیستگ اَنت ءُ بلوچ راج ءِ گون ءَ آیانی زوراکی ءِ دُژمنی ءَ منّ این ءُ ما چہ اسلام آباد ءَ وتی زھرشانی ءِ ھلاس کنگ ءِ جار جن ایں۔ 27 جنوری ءَ شال ءَ مراگشے برجم دار ایں۔
