اوتل: لوامز یونیورسٹیءِ نودربراں انتزامیہ ءِ زوراکیانی بگیری ءَ زھرشانی روانکے کش اتگ کہ روانک ءَ بچک ءُ جنکیں نودربراں بازیں کچے ءَ بھر زرتگ ۔
زھرشانی کنوکیں نودربراں پلے کارڈ دستاں بیتگ اَنت کہ آیانی سر ءَ جتا جتائیں اوگام نبشتہ بیتگ ءُ آیاں انتزامیہ ءِ زوراکیانی بگیریءَ اوگام جتگ ءُ انساپ ءِ لوٹ کرتگ۔
آیاں تران کرتگءُ گوشتگ کہ مئے زھرشانی ءِ مول ھمیش اِنت انتزامیہ بیت ءُ مئے لوٹاں گوش بدار ایت بلے انتزامیہ چو مدامی وڑءَ وتی کینگ ءِ سر ءَ اوشتاتگ ءُ پہ مئے لوٹانی گوش دارگ ءَ آھگ ءَ نہ اِنت۔ ما نہ پیش ءَ آیانی گلامی من اتگ ءُ نہ دیم ءَ من ایں۔
آیانی گوشگ اِنت کہ مئے نھ سنگت انگت ءَ زندان ءَ بندیگ اِنت ءُ یک سنگتے انگت ءَ گوں ناگیگیں جاوراں نادراھجاہ ءَ اِنت۔ اے جیڑہ تھنا مئے انوگیں جیڑہ نہ اِنت اگاں ما بے توار بہ بہ ایں گڑا اے زوراکی داں مئے پدریچاں ھم برجاہ بیت۔
آیانی گوشگ اِنت کہ ما انوں پہ اے زھرشانی ءَ درکپتگ ایں ایشی داں ھما وھد ءَ دار ایں دانکہ انتزامیہ بیت ءُ مئے لوٹاں گوش بدار ایت۔ دانکہ مئے لوٹ منگ نہ بیتگ اَنت اگاں چونیں ھم جاور ودی بہ بیت بلے ما وتی زھرشانی ءَ ھلاس نہ کن ایں۔
