بلوچ راجدوستیں سروک رھیم بلوچ ایڈوکیٹ ءَ وتی شنگ کرتگیں درشانے ءَ گوشتگ کہ بی ایس او ءِ پیشیگیں چیئرمین،ورنائیں راج دوست، سرڈگار ءُ انسان دوستیں سروک زبیر بلوچ ایڈوکیٹ ءُ نسار بلوچ ءِ ناھکیں کوش ریاستی ناشرکاری ءُ بلوچ چکچینی اِنت ءُ تچکیں کوشے۔ شھید زبیر بلوچ ءُ نسار بلوچ نہ کوھاں بیتگ اَنت ءُ نہ آ باگی بیتگ اَنت۔
آئی ءَ گوشتگ کہ زبیر بلوچ ایڈوکیٹ وتی مردمانی کیسانی رندگیری ءَ آمیدگس ءَ پیش بوگ ءَ بیتگ۔ پمشکا پہ آئی دزگیر کنگ ءَ آئی گس ءَ پاکستانی پوج، ایپ سی، سی ٹی ڈی، پولیس ءُ چیریں ادارھاں گوں مزنیں سلاھاں ارش کرتگ۔ چہ جاور ءُ ویل ءَ ساپ گندگ بیت کہ ریاستی ادارہ پہ آئی دزگیری ءَ نہ بلکیں کشگ ءَ شتگ اَنت۔
رھیم بلوچ ایڈوکیٹ ءَ گوشتگ کہ پاکستانی پوج، چیریں ادارہ ءُ آئی باڑھی کشندہ چہ دھکا ں بلوچ چکچینی کنگ ءَ اَنت ءُ چیئرمین زبیر بلوچ زوریں بیگواھی ءُ درکانودی کوشاں ریاست ءِ بگیری ءَ یک مھکمیں توارےبیتگ۔ ریاست ھمک ھما پارٹی، گل ءُ مردم ءِ توار ءِ دارگ ءِ جھد ءَ کنت کہ آبلوچستان ءَ زوریں بیگواھی، درکانودی کوش، بلوچستان ءِ مڈیانی لٹ ءُ پل ءُ ریاست ءِ بگیری ءَ توار چست کنت۔
آئی ءَ گوشتگ کہ بلوچستان ءَ زوریں بیگواھی ءُ درکانودی کوشانی زمہ وار تھنا لشکری ادارہ نہ اَنت بلکیں دروگین ءُ مزنیں اسمبلی، وتگڑیں سرکار ءُ آمیدگس ھم بلوچ چکچینی ءِ میارباری ءَ شریدار اَنت۔ بلوچ راج ریاستی زوراکیانی دیم ءَ سر جھل نہ کنت بلکیں چہ زورگریں ریاستءَ داں آجوئی ءَ جھد ءَ برجاہ دار ایت۔
