بلوچ نیشنل موومنٹ ( بی این ایم ) ءِ چیئرمیں ڈاکٹر نسیم بلوچ ءَ ماں چاگردی رسانکدر ایکس ءَ دالبندین ءَ زبیر بلوچ ءِ کوش ءِ پژدر ءَ نبشتگ کہ پاکستانی پوج ءَ یک گسے ءَ بیڑ برتگ ءُ بی ایس او ءِ پیشیگیں چیئرمین زبیر بلوچ گوں آئی دگہ سنگتے نسار بلوچ ءَ ھوار کشتگ۔ اے دگہ میڑے نہ بیتگ بلکیں یک درکانودی کوشے بیتگ۔
آئی ءَ گوشتگ کہ آیانی کوش ڈاکٹر منان بلوچ ءُ آئی سنگتانی ھواری ءَ رزا جھانگیر ، امداد بجیر ءُ آدگہ مردمانی ناھکیں کوش ءِ ترانگ ءَ دنت کہ پاکستانی پوج ءَ گسانی سر ءَ ارش کرتگ ءُ آ کشتگ اَنت۔
بی این ایمءِ چیئرمین ءَ گوشتگ کہ بلوچستان ءَ جیڑگ، گپ جنگ ءُ سیاسی گل ءِ ٹھینگ ھم میارے جوڑ بیتگ۔ مئے سروک، نبشتہ کار، ڈاکٹر ءُ نودربر کس بکشگ بوگ ءَ نہ اِنت۔ پاکستان ءَ بلوچستان یک کوش جاھے جوڑ کرتگ۔
