لسبیلہ یونیورسٹی ءَ پولیس ءَ بلوچ نودربرانی برجاھیں زھرشانی نندانک ءِ سر ءَ بیڑ برتگ ءُ گوں نودربراں زوراکی کرتگ ءُ باز نودربر دزگیر کرتگ۔
اھوالکار ءِ رد ءَ لسبیلہ یونیورسٹی ءِ بلوچ نودربراں انتزامیہ ءِ زوراکیانی بگیری ءَ لھتیں روچ اِنت کہ زھرشانی ءَ نشتگ اَنت۔ مرچی پولیس ءَ آیانی زھرشانی نندانک ءَ بیڑ برتگ ءُ زھرشانی پہ زور ھلاس کنائینتگ ءُ ھمے میان ءَ پولیس ءَ باز نودربر دزگیر کرتگ ءُ برتگ۔
پہ جیڑھانی گیش ءُ گیوار نہ کنگ ءِ سوب ءَ نودربر مرچی تبکاں نہ شتگ اَنت۔ پولیس ءَ یونیورسٹی ءِ ھاسٹل ءَ بیڑ برتگ ءُ گوں نودربراں زوراکی کرتگ ءُ باز نودربر دزگیر کرتگ۔ انگت ھم نودربرانی دزگیری برجاہ اِنت۔
چہ پولیس ءِ تیرگواری ءَ باز نودربرانی ٹپی بوگ ءِ ھم ھال اِنت۔
