بلوچ وومن پورم ءِ سروک ڈاکٹر شلی بلوچ ءَ ماں رسانکدر ءَ وتی شنگ کرتگیں تامربندے ءَ گوشتگ کہ رپیک اومان ءَ 21 ستمبر 2014 ءَ ریاستی ادارھانی کارمنداں چہ تربت ءَ آوار جتگ ءُ بیگواہ کرتگ کہ داں مرچی آئی ھچ ھال نیست۔ رپیک اومان یک راھدربرے ءَ ھوار یک بلوچی گشندھے ھم بوتگ ۔ آمدام پہ بلوچی زبان ءِ دیمروئی ءَ ساڑی بوتگ۔
ڈاکٹرشلی بلوچ ءَ گوشتگ کہ ریاست بلوچ ءِ ھما سراں زندانی کنگ ءَ انت کہ آ بلوچ ءِ زانتکایں سر اَنت۔ آ یک راجے ءَ وشیں بانداتے دات کن اَنت ۔ آ نہ لوٹ ایت کہ یک ایردستیں راجے دیمروئی بہ کنت۔ آ مدام یک ایردستیں راجے ءَ تھاروکی ءِنیمگ ءَ تیلانک دیگ لوٹ ایت۔
آئی گوشتگ کہ مرچی رپیک اومان ءِ گارءُ بیگواھی ءَ یازدہ سال سرجم بوتگ ۔ اے یازدہ سال بہ گندے دو لبز انت آیانی گوشگ ارزان انت بلےاے یک مزنیں مدتے ءُ ایشی میان ءَ کھول کجام درد ءُ جنجالانی دیمپان اِنت ءُ گوں کجام جنجالاں وتی روچاں گوازینگ ءَ اِنت۔ یک مردمے ءِ گارءُ بیگواھی تھنا یکے رنج نہ اِنت آئی ھواری ءَ سرجمیں کھول اے جنجالانی دیمپان بیت۔ ھما مردم کہ آ گس ءِ یکیں والینوک بیت وھدے کہ آ گار ءُ بیگواہ کنگ بیت گڑا کھول باز جنجالانی دیمپان بیت۔
ڈاکٹر شلی ءَ گوشتگ کہ مرچی رپیک اومان ء ِ بیگواھی ءِ یازدہ سال سرجم بوگ ءَ آئی کھول ءَ یک کمپینے ءِ جار جتگ کہ بیگاہ ءِ ادار شش ءَ داں شپ ءِ ادار دوازدہ ءَ برجاہ بیت ۔ من گوں بلوچ راج ءَ لوٹ کناں کہ بیگواھیں بلوچ پسگانی توار جوڑ بہ بہ ات۔ داں ھما وھد ءَ توار جوڑبہ بہ اِت دانکہ بلوچ ءِ یک زھگے ریاست ءِ زندانانی تہ ءَ بندیگ اِنت۔
آئی گوشتگ کہ ما ھما وھد ءَ ریاست ءِ زوراکیاں داشت کن ایں وھدے کہ ما یکجاہ بہ بہ ایں۔ پرچا کہ یکمشتی مارا گیش مھکم کنت۔ ما کہ وھدے بھر ءُ بانگ بہ ایں گڑا ما نزور بہ ایں ۔ گوں بلوچ راج ءَ منی ھمے لوٹ انت کہ آ اے جاورانی تہ ءَ یکمشت بہ بیت ۔
