شال؛ پاکستانی پوج ءِ دست ءَ زوربیگواہ کرتگیں اکیل اھمد ءِ گھار ءُ پت وائس پار بلوچ مسنگ پرسن ءِ گدان ءَ آتکگ ءُ نسراللہ ءِ ھواری ءَ پریس کانپرنس کرتگ ءُ گوشتگ کہ سی ٹی ڈیءِ کارمنداں 16 ءُ 17 ستمبر ءِ میانی شپ ءَ رند آباد سبزل دگ ءَ مئے گسءَ بیڑ برتگ گوں آیاں چار سادگ پوشاکیں مردم ھم گون بوتگ۔
آئی ءَ گوشتگ کہ سی ءُ چل سی ٹی ڈی ءِ کارمنداں منی برات اکیل اھمد ء لال مھمد درکانودی آوارجتگ ءُ گوں وت برتگ۔
آئی گوشتگ کہ ھمے میان ءَ سی ٹی ڈی ءِکارمنداں من، منی مات ءُ برازتک آزار داتگ ءُ سرجمیں گس پٹ ءُ پول کرتگ ءُ الماریانی کبل ھم پروشتگ اَنت۔ چہ مئے گس ءَ سئے موبائل اِش برتگ۔
آئی گوشتگ کہ ائے کاروائی ءِ سی سی ٹی وی ءِ تامر بند مئے کر ءَ ھست کہ اود ءَ ساپ گندگ بیت کہ سی ٹی ڈی ءِ کارمند اں ھوار سادہ پوشاکیں سلاہ بندیں مردم گس ءَ پتر انت ءُ منی برات ءَگران کن اَنت ءُ گوں وت بر اَنت ۔
آئی گوں سرکار ءَ لوٹ کرتگ ءُ گوشتگ کہ آ سی ٹی ڈی ءِ اے درکانودی گامگیج ءِ بگیری ءَ گامگیج بہ زور ایت ءُ منی برات اکیل اھمد ءِ آجوئی ءَ دلجمی بہ دنت ءُ مئے کھول ءَ چہ سسائی نادراھیاں بہ رکین ایت ۔
