بلوچ ریپبلکن پارٹی ( بی آر پی ) ءِ جارکش شیر مھمد بگٹی ءَ وتی شنگ کرتگیں درشان ءَ گوشتگ کہ ڈیرہ بگٹی ءِ ھند لنجو ءُ سگاری ءَ شھید نواب اکبر ھان بگٹی ءِ ڈگارانی سر ءَ ایپ سی چہ کشندہ ٹولی ءِ کمک ءَ دستیگ کنگ ءِ جھد ءَ اِنت ءُ ایشی مول ھمیش اِنت کہ کشندہ ٹولی ءَ ایپ سی ءِ نیمگ ءَ شریں وڑے ءَ مالی کمک کنگ ءُ مزنیں کچے ءَ سلاہ، گولا، شورہ ءُ نوکیں کواڈ کاپٹر ڈرون دیگ ءَ اِنت۔
آئی ءَ گوشتگ کہ گوستگیں چنچو ھپتگ اِنتاِنت کہ سگاری ءُ لنجو ءَ شھید نواب اکبر ھان بگٹی ءِ ڈگارانی سر ءَ کشندہ ٹولی ءِ نیمگ ءَ تراکناکیں شورہ چیر کنگ بوگ ءَ اِنت۔ اے شورہ ءُ سلاہ چہ ایپ سی ءِ نیمگ ءَ دیگ بوگ ءَ اَنت ءُ اے کار ءِ سروکی ءَ ایپ سی کنگ ءَ اَنت۔
شیرمھمد بگٹی ءَ گوشتگ کہ تھنا یک روچے ءَ ڈگارانی سر ءَ سے چیر کرتگیں بمبانی تراک ءَ یک جنینے ءُ یک زھگے ءَ ھوار سے مردم بیران ءُ شش مردم ٹپی بیتگ کہ آیانی تہ ءَ جنین ھم ھوار اَنت۔ چہ ایشی ءَ ابید دگہ یک بمبے ءِ ترکگ ءَ درزنانی کچ ءَ مال مرتگ۔
آئی گوشتگ کہ ایپ سی ءِ نیمگ ءَ کشندہ ٹولی ءِ مھکم کنگ ءُ چہ ایشی ءَ ٹکے ءِ سروکے ءِ ڈگارانی دستیگ کنگ ءِ جھد ءِ آسر ءَ چونیں ھم جاور ودی بہ بیت ایشی درسیں زمہ واری ایپ سی ءِ سر ءَ بنت۔
