اسلام آباد ءَ بلوچستان ءِ جاہ منندیں ریاستی زوراکیانی آماچیں کھولانی زھرشانی نندانک ءَ شست روچ سرجم بیتگ کہ انگت برجاہ اِنت۔ اے زھرشانی ءَ چہ بلوچستان ءِ جتائیں ھند ءُ دمگانی زور بیگواھیں مردمانی کھول ھوار اَنت۔
اے بابت ءَ آیانی گوشگ اِنت کہ مئے زھرشانی ءَ شست روچ سرجم بیتگ ءُ سرکار ءِ نادرسی انگت ءَ برجاہ اِنت ءُ ابید چہ بے تواری ءَ دگہ ھچ وڑیں گامگیج زورگ بوگ ءَ نہ اِنت۔
آیانی گوشگ اِنت کہ مارا گوستانک ءَ پیش داشتگ کہ بلوچ ءَ کدی بے اوست بوگی نہ اِنت۔ پیش ءَ ھم بلوچ بے اوست نہ بیتگ اَنت ءُ دیم ءَ ھم نہ بنت۔ انچو روچ ءِ نندانک ءَ پد ھم مئے توکل مھکم اِنت۔
آیانی گوشگ اِنت کہ مئے لوٹ ڈاکٹر ماہ رنگ بلوچ ءُ آئی سنگتانی آجوئی ءُ بلوچستان ءَ بلوچ چکچینی ءِ بند کنگ اِنت۔ سرکار ءِ مردم ھمے سرپد بنت کہ ما بے اوست بہ ایں ءُ پاد کائیں بلے ما بے اوست نہ بہ ایں۔ دانکہ مئے لوٹ منگ نہ بیتگ اَنت مئے زھرشانی برجاہ بیت۔
