اسلام آباد: بلوچ یکجھتی کمیٹی ءِ سروک سمی دین ءَ ماں چاگردی رسانکدر ایکس ءَ نبشتگ کہ اسلام آباد ءَ ترندیں ھور ءُ ھارانی میان ءَ واکداریں شھر ءِدگانی سر ءَ بلوچ مات ءُ زوربیگواھیں مردمانی کھول یکشل ءَ زھرشانی ءَ نشتگ اَنت۔ نہ آیاں ٹینٹ جنگ ءِ موکل دیگ بیت نہ آیاں دگہ آسراتی ھست۔ اسلام آباد پریس کلب ءَ لھتیں گام دیم ءَ زھرشانی برجاہ اِنت بلے اھوالکاراں نزیک ءَ آیگ ءُ آیانی درد انی جھان ءَ سر کنگ ءِ موکل دیگ نہ بیت۔
آئی گوشتگ کہ اے درس تھنا اوست ءُ توکل ءِ کمک ءَ برجاہ اِنت۔ اے کھولانی کچ بل ئے کم اِنت بلے آیانی توکل چہ ھزار توار ءَ توانمند اِنت۔ گوستگیں 48 روچ اِنت کہ آ اسلام آباد ءِ دگانی سر ءَ نشتگ اَنت۔ بیھار ءُ ھر وڑیں جنجالاں ابید آیانی زھرشانی برجاہ اِنت۔
سمی دین ءَ گوشتگ کہ اے مات ءُ گھارانی توکل اے ریاست ءُ آئی سرکار ءَ یک تچکیں چیلنج ءُ شرم ءِ گپے۔ اے ھمے راستی ءِ جار اِنت کہ زور، گرم، ھور ءُ زوراکیانی ھم آیانی توکل پروش دات نہ کرتگ۔
