بلوچ راجی آجوئی سنگر ( براس ) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ که براس ءِ سرمچاراں ھزدار ءِ ھند زھری دستیگ کرتگ ، اے اُرشاں زورگریں پوج ءِ 37 کارمند کشتگ ھمے وڑ ءَ پوج ءِ گاڑی ، سلاه ءُ آدگه سامان سرمچاراں دستیگ کرتگ اَنت ، اُرشانی میان ءَ زورگریں پوج ءِ سے کارمند ءُ سی ٹی ڈی ءِ یک کارمندے دزگیر کرتگ ، براس ءِ سرمچاراں کردگاپ ، سوراب ، مشکے ءُ مستونگ ءَ ھم پوج نشانگ کرتگ ءُ دگ بستگ اَنت۔
آئی ءَ گوشتگ که اے کاروائی براس ءِ 10 اگست ءَ بندات بیتگیں اُرشانی بھر اَنت ، چه ایشی ءَ پیش براس ءَ 71 اُرش ءِ زمه واری من اتگ اَت که اے نوکیں کاروائیانی گون ءَ سرجم ءَ 76 ءَ سر بیتگ اَنت۔
جارکش ءَ گوشتگ که براس ءِ سرمچاراں 11 اگست ءَ هزدار ءِ شھر زھری ءَ مردمانی میان ءَ تران کرتگ ، ھمے وھد ءَ سرمچاراں شوربندی ءِ پارست ءَ مزنین شھدگ ءُ راھانی سر ءَ سنگر گپتگ ءُ نشتگ اَنت ، زورگریں پوج ءَ گوں 13 گاڑیاں کاروان ءِ دروشم ءَ لشکرکشی کنگ ءِ جھد کرتگ که گزان ءِ ھند زولپکار آباد ءَ سنگر گپتگیں سرمچاراں گوں نوک ءُ ٹوھیں سلاھاں نشانگ کرتگ اَنت۔
آئی ءَ گوشتگ که پوج ءِ ھشت گاڑی اُرش ءِ زد ءَ اتکگ ، اے کاروائی ءَ پوج ءِ یک ٹرکے سرجم ءَ تباه بیتگ ، ھمے وڑ ءَ سرمچاراں دو گاڑی گوں پوجی ساماناں دستیگ کرتگ ، اُرش ءِ میان ءَ پوجی کارمند ترس ءِ آماچ بیتگ اَنت ءُ باگانی نیمگ ءَ تتکگ اَنت که سرمچاراں انگر ءَ کرتگ اَنت ءُ بازیں کارمند کشتگ ، لھتیں کارمند ھندی گساں پُترتگ ءُ په وتی رکینگ ءَ جنین ءُ زھگ کارمرز کرتگ اَنت بلے شپ ءَ تچگ ءِ وھد ءَ بازیں کارمند کشگ یا ٹپی بیتگ۔
جارکش ءَ گوشتگ که براس ءِ سرمچاراں گزان ءِ ھند سینکوری ءَ پاکستانی پوج ءِ چوکی یے گوں راکٹ ءُ وتکاریں سلاھاں نشانگ کرتگ ، ھمے وڑ ءَ چه زالکان ءَ پاکستانی پوج ءِ لشکرکشی کنوکیں کارمندانی ٹولی اسپیدک ءِ ھند ءَ پدکنز کنگ ءَ لاچار کرتگ اَنت۔
آئی ءَ گوشتگ که داں دو روچ ءَ برجاھیں اُرشاں زورگریں پوج ءِ 37 کارمند مرتگ ءُ بازیں کارمند ٹپی بیتگ ، پوج ءَ گوں ھیلی کاپٹراں تیرگواری گوں ڈرون ءُ کواڈ کاپٹراں بمبگواری کرتگ بلےسوبین نه بیتگ۔
جارکش ءَ گوشتگ که 20 روچ اِنت که زھری سرمچارانی دست ءَ اِنت ، سرمچاراں زھری ءِ ته ءَ راھانی سر ءَ چوکی جوڑ کرتگ ءُ نندوک اَنت ۔
آئی ءَ گوشتگ که زهری ءَ سرمچارانی بیڑ برگ ءِ میان ءَ پوج ءِ سے کارمند دزگیر کرتگ ، ھمے وڑ ءَ زھری – کلات ءِ شھدگ ءَ دگ بندی ءِ وھد ءَ سی ٹی ڈی ءِ یک کارمندے ءَ هوار دو مردم دزگیر کرتگ ، آیانی بابت ءَ جست ءُ پرس برجاه اِنت ، چه ایشی ءَ پد بلوچ راجی آمیدگس آیانی یل کنگ یا سزا دیگ ءِ بابت ءَ پیسله کنت ۔
جارکش ءَ گوشتگ که سرمچاراں 11 اگست ءِ شپ ءَ مستونگ ء ھند کڈکوچگ ءَ پوج ءِ بنجل ءِ سر ءَ اُرش کرتگ۔
آئی ءَ گوشتگ که سرمچاراں 11 اگست ءَ مستونگ ءِ ھند کردگاپ ءَ داں باز اَداراں مزنیں شھدگ بستگ ءُ لیویز ءِ چوکی دستیگ کرتگ ءُ لیویز ءِ دو گاڑی گپتگ ، چه ایشی ءَ پد پوج ءِ ھیلی کاپٹراں لس مساپرانی پرپٹانی سر ءَ تیرگواری کرتگ که ایشی اسر ءَ سے مردم بیران بیتگ۔
جارکش ءَ گوشتگ که براس ءِ سرمچاراں 13 اگست ءَ کیچ ءِ ھند سامی ءَ زورگریں پاکستانی پوج ءِ چوکی ءِ سر ءَ گوں راکٹ ءُ آدگه ٹوھیں سلاھاں اُرش کرتگ ، چه ایشی ءَ پوج ءَ جانی ءُ مالی تاوان بیتگ۔
آئی ءَ گوشتگ که براس ءِ سرمچاراں 14 اگست ءَ مشکے ءِ ھند تنک گرمیں کور ءَ پوج ءِ سر ءَ اُرش کرتگ ، جنگ داں یک اَدارے ءَ گیش برجاه بیتگ که ایشی آسر ءَ پوج ءَ جانی ءُ مالی تاوان بیتگ۔
جارکش ءَ گوشتگ که سرمچاراں 16 اگست ءِ شپ ءَ سوراب ، تارکی ڈیم ءِ نزیک ءَ داں سے اَدار ءَ شال – کراچی ءِ مزنیں شھدگ بستگ ءُ پٹ ءُ پول کرتگ۔
براس ءِ جارکش بلوچ هان ءَ درشان ءِ گڈی ءَ اے درسیں کاروائیانی زمه واری من اتگ ءُ گوشتگ که ما اے گپ ءَ تچک ءَ گوش ایں که زورگریں پاکستانی پوج ، آئی ءِ چیریں اداره ، کشنده ٹولی ءُ آدگه کمکار که بلوچ راجی ھستمان ، سرڈگار ، مڈی ءُ راجی شرپ ءِ بگیری ءَ کار ءَ اَنت آیانی دیم ءَ گھگیری کن ایں ، مئے جھد داں سرجمیں بلوچستان ءِ آجوئی ءُ راجی وتواجھی ءَ برجاه بیت ءُ زورگریں توانمندانی سر ءَ نه تھنا مئے اُرش برجاه بنت بلکیں گیش کنگ ھم بنت۔
