کراچی: پہ زور بیگواھیں زاھد الی بلوچ، سرپراز بلوچ شیراز بلوچ ءُ سیلان بلوچ ءِ آجوئی ءَ کراچی پریس کلب ءِ دیم ءَ برجاھیں زھرشانی نندانک ءَ بیست ءُ ھپت سرجم بیتگ کہ انگت ءَ برجاہ اِنت۔
زھرشانی نندانک ءَ پہ کھولانی ھمدردی درشان کنگ ءَ سیاسی ءُ انسانی ھکانی کارکناں ھوار جتائیں بھرگاں سیادی داروکیں مردم پہ ھمدردی درشان کنگ ءَ پیداک اَنت۔
زھرشانی ءَ نشتگیں مردمانی گوشگ اِنت کہ زوریں بیگواھی ھما درد اِنت کہ سرجمیں کھول ءَ جنجالانی دیمپان کنت۔ مئے آزیز ءُ گسانی والینوک چنچو ماہ اِنت کہ ریاستی ادارھانی دست ءَ بے میار ءَ برگ ءُ بیگواہ کنگ بیتگ اَنت۔
آیانی گوشگ اِنت کہ اگاں چہ یک گسے ءَ دو دو مردم زور بیگواہ کنگ بہ بیت گڑا آ گس تباہ بیت۔ مارا چنچو وھد اِنت کہ پہ وتی بیگواھیں آزیزانی آجوئی ءَ وداریگ ایں انگت ءَ مارا آیانی بابت ءَ ھچ وڑیں سرپدی دیگ بوگ ءَ نہ اِنت۔
آیانی گوشگ اِنت کہ مئے لوٹ ھمیش اَنت اگاں مئے مردمانی سر ءَ چونیں بھتام ھست گڑا آمیدگس ءَ پیش کنگ بہ بنت۔ بے میار اَنت گڑا زوت یل کنگ بہ بنت ءُ کھول چہ رنجاں کشگ بہ بنت۔
