اسلام آباد ءَ بلوچ کھولانی نیمگ ءَ برجاھیں زھرشانی نندانک ءَ چل ءُ پنچ روچ سرجم بوتگ کہ انگت ءَ برجاہ اِنت۔ اے وھد ءَ بلوچ یکجھتی کمیٹی ءِ بندیگیں سروک ءُ زور بیگواھیں مردمانی کھول بازیں کچے ءَ زھرشانی نندانک ءَ ساڑی اَنت۔
آیاں چو مدامی وڑ ءَ پہ وتی لوٹانی ھک ءَ مرچی ھم زھرشانی روانکے کش اِتگ ءُ زور بیگواھی ءُ بی وائی سی ءِ سروکانی یل نہ کنگ ءِ بگیری ءَ اوگام جتگ۔
آیاں تران کرتگ ءُ گوشتگ کہ انچو روچ ءِ گوزگ ءَ پد ھم ریاست ءِ نیمگ ءَ مئے گپ گوش دارگ بوگ ءَ نہ اَنت ءُ بلوچ ءِ بیگواھی ءِ جیڑہ ءَ انگت ءَ جیڑہ سرپد بوگ ءَ نہ اَنت۔ ریاستی ادارھاں انگت ءَ ھمت نہ کرتگ کہ آ بیا اَنت ءُ مات ءُ گھارانی گپاں دلگوش بہ کن اَنت۔
آیاں گوشتگ کہ ھما اِنت بی وائی سی ءِ سروک بندیگ کنگ بیتگ اَنت چہ ایشی ءَ پد بلوچستان ءَ بلوچ چکچینی ءُ زوریں بیگواھی گیش بوگ ءَ اِنت۔ زی ھم پنچ انچیں گونڈو برگ بیتگ کہ آیانی امر چہ ھژدہ سال ءَ کم اَنت۔ نودربر ءُ سیاسی کارکن بہ بنت یا زھگ ءُ جنین بہ بنت کس چہ زوراکیاں پشت کپگ ءَ نہ اِنت۔
آیاں گوشتگ کہ بلوچاں زوراکیانی بگیری ءَ ھما گھگیری بندات کرتگ ءُ انگت برجاہ اِنت گڑا ھمک بلوچ ءِ سر ءَ پرز بیت کہ ھمے گھگیری ءَ ھوار بہ بیت ءُ وتی راجی پرز ءَ پیلو بہ کنت۔
آیاں گوشتگ کہ ھما مردم گوں زوراکیاں بے توار کنگ بیتگ اَنت ما گوں آیاں لوٹ کن ایں کہ آ بے توار مہ بنت ءُ پاد بیا اَنت ءُ اے گھگیری پ بھر بزور اَنت۔ چی ءَ کہ مئے ءُ شمئے یکمشتی مارا منزل ءَ سر کنت۔ نوں پہ بلوچ ءَ گھگیری ءَ ابید دگہ ھچ پشت نہ کپتگ۔
