اسلام آباد ءَ پہ بلوچ یکجھتی کمیٹی ءِ سروک ءُزور بیگواھیں مردمانی پد جنگ ءَ برجاھیں زھرشانی نندانک ءَ چل ءُ چار روچ سرجم بیتگ کہ انگت ءَ برجاہ اِنت۔
اے بابت ءَ زھرشانی ءَ نشتگیں مردمانی گوشگ اِنت کہ گوستگیں شش ھپتگ اِنت پیرزالیں مات، گھار ءُ کسانیں زھگ اے موسم ءُ ریاستی نادرسی ءُ سرکار ءِ نادلگوشی ءَ اوپار کنگ ءُ نشتگ اَنت۔
آیانی گوشگ اِنت کہ اے میان ءَ چہ سرکار ءِ نیمگءَ پہ مئے لوٹاں ھچ وڑیں دلجمیں گامگیج زورگ بوگ ءَ نہ اِنت ءُ نہ آئی رسانکدر پہ اے سانمندیں کھولانی پریات ءِ گوش دارگ ءَ گندگ بیتگ۔ بلے چہ درسیں جنجالاں ابید اے کھولاں وتی گھگیری برجاہ داشتگ ءُ انساپ ءِ لوٹ ءَ کنگءَ اَنت۔ آیانی گوشگ اِنت کہ انچو روچ ءِ گوزگ ءَابید چہ ریاستءِ نیمگءَ ما ھمے گندگ ءَ ایں کہ آئی ءَ مئے ھچ پرواہ نیست۔ آ ھمےسرپد بیت کہ ما ایشاں ھمنچو دور داراں اے بے اوست بنت پاد کاینت۔ دانکہ مئے لوٹ گوش دارگ نہ بنت ءُ مئے بی وائی سی ءِ رھشوناں ھوار بیگواھیں مردم یل کنگ نہ بنت مئے زھرشانی برجاہ بیت۔
