کراچی: پاکستانی پوج ءِ جوڑ کرتگیں چیریں ادارھانی دست ءَ زور بیگواھیں زاھد بلوچ ءِ کھول ءِ زھرشانی نندانک ءَ کراچی پریس کلب ءِ دیمءَ نوزدہ روچ سرجم بیتگ کہ انگت ءَ برجاہ اِنت
چہ زھرشانی نندانکءَ زاھد بلوچ ءِ پت ابدلھمید بلوچ ءَ گوشگ اِنت کہ منی زھگ زاھد الی ءِ زوریں بیگواھی ءَ سی ءُ ھشت روچ سرجم بیتگ۔ مارا انگت ءَ آئی بابت ءَ ھچ وڑیں سرپدی دیگ ءَ نہ اَنت ءُ ما نہ زان ایں منی زھگ کجام میار ءَ بیگواہ کنگ بیتگ ءُ مارا کجام میارءِ سزا دیگ بوگ ءَاِنت۔
آئی گوشگ اِنت کہ منی لوٹ ھمیش اِنت کہ اگاں منی زھگ ءِ سر ءَ چونیں بھتامے ھست گڑا آمیدگس ءَ پیش کنگ بہ بیت بے میار اِنت زوت یل کنگ بہ بیت۔ مئے زھرشانی ءَ نوزدہ روچ سرجم بیتگ انگت ءَ چہ سرکارءِ نیمگءَ پہ مئے لوٹاں ھچ وڑیں گامگیج زورگ بوگ ءَ نہ اِنت۔
ابدلھمید بلوچ ءَ گوشتگ کہ من گوں انسانی ھکانی ادارہ، رسانکدر، آمیدگس ءَ ھوار گوں درسیں مردماں لوٹ کن آں کہ پہ منی زھگ ءِ آجوئیءَ مارا کمک بہ کن اَنت۔
