بلوچ یکجھتی کمیٹی ءِ سروک سمی دینءَ ماں رسانکدر ءَ وتی شنگ کرتگیں درشانے ءَ گوشتگ کہ میر یوسپ کلندرانی 17 اگست ءَ چہ کراچی ءَ پوج ءَ بیگواہ کرتگ۔ یوسپ کلندرانی ءِ سے برات پیسر ءَ 2011 ءَ گوں دگہ بازیں سیاداں زور بیگواہ کنگ بیتگ اَنت کہ آیانی ھچ وڑیں ھال نیست آ کج ءَ اَنت ءُ گوں کجام جاوراں بندیگ اَنت۔
آئی ءَ گوشتگ کہ چہ ریاستی زوراکی، بلوچ چکچینی ءُ زوریں بیگواھیاں بلوچستان ءِ چونیں ھم گسے پشت نہ کپتگ، اے سکا مزنیں جیڑھے کہ ھما گس گوستگیں چاردہ سال اِنت پہ وتی آزیزانی آجوئی ءِ رھچاری ءَ زند گوازینگ ءَ اَنت آیاں انگت ءَ انساپ نہ رستگ بلکیں ھما گسانی گیشتر مردم زور بیگواہ کنگ بوگ ءَ اَنت۔ اگاں اے چکچینی ءُ زوراکی یے نہ اِنت گڑا چی یے۔
