بلوچ وومن پورم ءِ بنجاھی کارگشاد ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ چکچینی گوستانک ءِ گنتریں وھدے ءَ گوزگ ءَ اِنت، اود ءَ بلوچانی بگیری ءَ زور کارمرز کنگ بوگ ءَ اِنت۔ بلوچ ورنایانی زوریں بیگواھی، ژانگولیں لاشانی چگل دیگ، گسانی ڈیرینگ، زھگ ءُ جنینانی کوش بلوچ چکچینی ءِ بھر اَنت۔ گوستگیں روچاں ایران ءِ نیمگ ءَ بلوچستان ءِ شھر پنجگور ءَ بمبگواری کنگ بوتگ ایشی آسر ءَ باز جنین ءُ زھگ شھید بوتگ ءُ آیانی گس سرجم ءَ تباہ بوتگ اَنت۔ دومی روچ ءَ پاکستان ءَ بلوچانی بگیری ءَ کاروائی کرتگ ءُ ایران ءِ چیردستیں بلوچستان ءَ سروان شمسر ءَ لس آبادی نشانگ کرتگ اَنت ءُ گوں ڈرون، میزائل ءُ نوکیں جنگی سلاھاں کودکیں بلوچانی گساں اُرش کرتگ گولانی آس دیگ ءَ باز گس تباہ بوتگ ایشی آسر ءَ بے میاریں زھگ ءُ جنیناں ھوار دہ مردم شھید بوتگ۔ شھید بوتگیں درس بلوچ اَنت۔
آئی ءَ گوشتگ کہ بلوچستان ءَ برجاھیں لشکرکشی، کشگ ءُ چگل دیگ ءِ شوندات ءِ سوب ءَ بلوچستان ءَ باز مردماں لڈ ءُ بار کرتگ ءُ ڈنی ڈیھاں شتگ اَنت ءُ باھوٹ اَنت جنجالیں زندمانے گوازینگ ءَ اَنت، بلے پاکستانی ادارہ آیاں اود ءَ ھم نہ بکش اَنت ءُ آیانی بگیری ءَ کاروائی کنگ ءَ اَنت۔ چہ ایشی ءَ بلوچ جنین ھم زوراکیانی آماچ اَنت ایشی منانک کینیڈا ءَ بانک کریمہ ءِ شھید کنگ اِنت۔
بنجاھی جارکش ءَ گوشتگ کہ جنین ءُ زھگانی شھید کنگ زوراکی ءِ گڈی سیمسر اِنت۔ کودکیں جنینانی سر ءَ اُرش کنگ ءِ مول بلوچ جنینانی جھد ءِ دارگ ءِ بے سوبین کوشست اِنت کہ بلوچستان ءَ پہ وتی ھکاں مڑگ ءَ اَنت۔ انوگیں بلوچ جنینانی گھگیری ءِ سوب ءَ ترس ھلاس بوتگ ایشی مھکم کنگ ءَ بلوچ جنین گھگیری زرمبشت ءَ بھر زورگ ءَ اَنت۔ ایشانی اے وڑ ءَ ناھکیں کوش گھگیری توار ءِ دارگ زانگ بیت۔
آئی ءَ گوشتگ کہ میان استمان ءِ جنگی راھبند ءِ رد ءَ چونیں ھم جنگی جاوراں جنین ءُ زھگانی ھیالدارگی اِنت کہ کاروائیانی تہ ءَ نشانگ کنگ نہ بنت۔ میان استمانی مردمی ھکانی ادارہ جنیوا کنونشنز ءِ رد ءَ پہ بلوچستان ءِ لس شھریانی ھکانی پھریزگ ءَ زوت گامگیج زورگ بہ بیت۔
