اسلام آباد: پہ بلوچ یکجھتی کمیٹی ءِ سروک ءُ زور بیگواھیں مردمانی پدجنگ ءَ برجاھیں زھرشانی نندانک ءَ سی ءُ چار روچ سرجم بیتگ کہ انگت ءَ برجاہ اِنت۔ سانمندیں کھول پہ وتی لوٹانی ھک ءَ ھمک روچ زھرشانی روانک کشگ ءُ اوگام جنگ ءَ اَنت۔
بلے سی ءُ چار روچ ءِ گوزگ ءَ ابید ھم چہ سرکار ءِ نیمگ ءَ پہ آیانی لوٹانی منگ ءَ انگت ءَ ھچ وڑیں گامگیج زورگ بوگ ءَ نہ اِنت۔ ھمک روچ چہ جتائیں بھرگاں سیادی داروکیں مردم پہ ھمدردی درشان کنگ ءَ زھرشانی جاہ ءَ پیداک اَنت۔
اے بابت ءَ آیانی گوشگ اِنت کہ مئے زھرشانی ءِ اولی رند نہ اِنت کہ ما اد ءَ اسلام آباد ءَ زھرشانی ءَ اتکگ ایں۔ چہ ایشی ءَ پیش ھم ما سرکار ءُ آئی ادارھانی رویشت دیستگ اَنت۔ بلے ما انگت ءَ ھمے ادارھانی سر ءَ بلاھیں اوست داشتگ ءُ اد ءَاتگ ایں۔
آیانی گوشگ اِنت کہ مئے آھگ ءِ مول ھمے بیتگ کہ اگاں ریاستی ادارہ مئے توار ءَ گوش نہ دار اَنت گڑا ما جھانءَرا ھمے بہ گوش ایں کہ مئے راجی رھشون بس پہ ھک ءِ گپ جنگ ءِ بنیاد ءَ بندیگ کنگ بیتگ اَنت۔
آیاں گوشتگ کہ ما مرچی بیگاہ ءِ شش ءَ داں دوازدہ ءَ ایکس ( ٹویٹر ) ءَ کمپینے برجم دارگ ءَ ایں ما گوں درسیں مردماں دزبندی کن ایں مئے کمپین ءَ بھر بزور اَنت۔
