مستونگ: پاکستانی پوج ءِ دست ءَ بے میار ءَ کشگ بیتگیں اھسان شاہ ءِ کشندھانی دزگیر نہ کنگ ءِ بگیری ءَ تھتگ بند ھرتال کنگ بیتگ ءُ درسیں بازار باپاری جاہ بند کنگ بیتگ اَنت۔
اے ھرتال ءِ جار چہ آئی کھول ءِ نیمگ ءَ جنگ بیتگ اَت ءُ پد ءَ بلوچ یکجھتی کمیٹی ءَ تھتگ بند ھرتال ءِ پلہ مرزی ھم کرتگ ۔
چوش کہ اھان شاہ پاکستانی پوج ءَ چہ آئید ءَ سے روچ پیش تیرگواری کرتگ ءُ کشتگ اَت آئی ناھکیں کوش ءِ بگیریءَ آئی مات داں سیزدہ روچ ءَ شال پریس کلب ءِ دیم ءَ زھرشانی ءَ نشتگ اَت۔ چہ زھرشانی نندانک ءَ پولیس ءَ اھسان شاہ ءِ مات آرپہ شاہ گوں آئی کسانیں زھگ ءَ آوار جتگ اَت۔
اے بابتءَ آرپہ شاہ ءِِ گوشگ اِنت کہ چہ شال پولیس ءِ آزار دیگ ءَمنی جنک نادراہ اِنت ءُ اے وھد ءَ نادراھجاہ ءَ الاج کنگ بوگ ءَ اِنت۔
