بلوچ وومن پورم ءِ سروک ڈاکٹر شلی بلوچ ءَ ماں رسانکدر ءَ وتی شنگ کرتگیں درشان ءَ گوشتگ کہ بلوچ جنین نمرہ کرد، لوھڑ کاریز شال کتابجاہ ءِ کارمستر بسم اللہ بلوچ ءُ آدگہ مردم کہ شال ءِ ھند سریاب ءَ چہ پرس ءِ جاھے ءَ آوار جنگ بیتگ اَنت اے سکا بژن ءُ دردناکیں ویلے۔ ھمےوڑ ءَ دو روچ پیش بیوٹمز ءِ اسسٹنٹ پروپیسر اسمان کازی ءُ آئی کستریں برات ءُ ایم پل ءِ نودربر اھمد چہ ھمے شھر ءَ درکانودی آوار جنگ ءُ بیگواہ کنگ بیتگ اَنت مئے ترس گیش کنت۔ نوں ھمے زوراکی ءَ جنین ءُ چاگرد ءِ وانندگ بھرگ مان پتاتگ۔
آئی ءَ گوشتگ کہ اے آوارجنیءِ ویل گوستگیں دو روچ اِنت کہ بلوچستان ءِ بنجاھی شھر ءَ بوگ ءَ اَنت اے شکا بژنی گپے۔ چہ درسیں پھازداریں گامگیجاں ابید کانود ءِ پھازداریں ادارہ یکشل ءَ شھریانی بنیادی ھکاں لگتمال کنگ ءَ اَنت۔ نوں پہ زانت درساں گیش باسما ءُ جنیناں نشانگ کنگ ءَ اَنت۔ ایشی بگیری ءَ گھگیری کنگ ھژدری اِنت۔
ڈاکٹر شلی بلوچ ءَ گوشتگ کہ من گوں سرکار ءَ لوٹ کن آں کہ آ زوریں بیگواھی ءِ شوندات ءِ سر ءَ ھیال ءَ گور بہ کنت کہ اے چاگرد ءِ زانوگریں مردماں کم کم ءَ وراں اِنت۔ ما ایشی ءَ چاگردی دیمروئی ءُ ایمنی ءِ سر ءَ ارش سرپد بہ ایں۔ ایشی تہ ءَ ریاست ءِ کانود ءِپھازداریں ادارھانی دست ھوار اِنت۔
آئی ءَ گوشتگ کہ من نمرہ بلوچ ءَ ھوار درسیں بیگواھیں مردمانی زوتیں یل کنگ ءِ لوٹ ءَ کن آں ۔
