زھگ ءُ جنینانی نشانگ کنگ مچی سزا ءِ درچ اِنت انسانی ھکانی گل زوراکیانی بگیری ءَ توار چست بہ کن اَنت۔ سمی دین بلوچ
بلوچ یکجھتی کمیٹی ءِ سروک سمی دین ءَ وتی شنگ کرتگیں درشانے ءَ گوشتگ کہ زی بیگاہ ءَ تمپ ءِ میتگ گومازی ءَ پاکستانی پوج ءِ نیمگ ءَ جتگیں مارٹر گولایے آبادی ءِ تہ ءَ کپتگ ایشی آسر ءَ چار زھگ سکا ٹپی بیتگ۔ چہ آیاں دوازدہ سالی ئیں زھگے مھمد ٹپانی درد نہ سگ اِتگ اَنت ءُ جاھی بیران بیتگ ءُ آدگہ ٹپی اَنت۔ ھمے شپ ءِ یازدہ ءَ پاکستانی پوج ءِ جوڑ کرتگیں کشندہ ٹولی ءِ کارمنداں تربت ءِ ھند آپسر ءَ ھدا داد ءِ گس ءَ دستی بمب اُرش کرتگ، چہ ایشی ءَ دو جنین سکا ٹپی بیتگ ءُ گس تاوان بیتگ۔
آئی ءَ گوشتگ کہ زھگ ءُ جنیناں ھوار بے میاریں شھریانی یکشل ءَ نشانگ کنگ ءِ ویل ریاستی زوراکیانی درچ اِنت کہ چہ ایشی ھندی مردمانی ترس آماچ کنگ ءُ مچی سزا دیگ ءِ شوندات ءَ پیش دار ایت۔
سمی دین ءَ گوشتگ کہ گوں انسانی ھکانی گلاں لوٹ کن آں کہ اے درکانودی گامگیج ءِ بگیری ءَ توار چست بہ کن اَنت۔
