اسلام آباد ءَ بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی ءَ بیست ءُ ھشت روچ سرجم بیتگ کہ انگت ءَ برجاہ اِنت۔ زھرشانی کنوکیں مردماں چو مدامی وڑ ءَ مرچی ھم زھرشانی روانکے کش اتگ ءُ پہ وتی لوٹانی ھک ءَ اوگام جتگ۔
اے بابت ءَ بلوچ یکجھتی کمیٹیءِ گوشگ اِنت کہ چہ اسلام آباد ءِ ترندیں گرم ءَ ابید پیرزال، زھگءُ جنین ءُ نودربر بے ساھگ ءَ زھرشانی ءَ دگ ءِ پھنات ءَ نشتگ اَنت۔ اسلام آباد پریس کلب کہ پہ سانمندیں مردمانی توار چست کنگ ءِجاہ اِنت آ جاہ ءَ بلوچ زھرشانی کنوکاں روگ ءَ نیلگءَ اَنت۔
آئی گوشگ اِنت کہ چہ کھولانی ھکی ئیں لوٹانی گوش دارگ ءَ ابید ریاست ءَ دگ بند کرتگ اَنت، آیاں یکشل ءَ ترس آماچ کنگ ءَ اِنت۔ چہ اے درسیں زوراکیاں ابید آیانی ارادہ مھکم اِنت۔
