بلوچ راجی زرمبشت ( بی این ایم ) ءِ جارکش ءَ گْوشتگ پنچ شمبے ءِ روچ ءَ روکپتی بلوچستان ءَ پاکستانی موشکانی نشانگ چہ رودرکتی بلوچستان ءَ لڈ اتگ ءُ شتگیں بلوچ بیتگ اَنت۔ اے ارشاں جنین ءُ زھگاں ھوار دہ باھوٹی شھید بیتگ۔ آیانی تہ ءَ بی این ایم ءِ راجمان پتر ءِ باسک دوستا مھمود ھم ھوار اِنت۔بی این ایم شھید چیئرمین دوستا ءُ دگہ شھیداں ستک شانی نْدر کنت۔ چیئرمین دوستا ءِ پہ زْرمبشت ءُ گل ءَ دیمونی مدام یات کنگ بہ اَنت ءُ آ ملی مئے یاتاں زندگ مان ایت۔
بی این ایم ءِ جارکش ءَ گْوشتگ کہ دوستا مھمود، رودرتکی بلوچستان ءِ ھند پروم ءِ جاہ منند اَت، چہ پاکستانی لشکر ءِ ھمروچگیں زوراکیاں دلسیاہ بیتگ ءُ گوں وتی کھول ءَ چہ پروم ءَ لھتیں کلومیٹر دور ایران ءِ بست ءُ بند ءِ تہ ءِ روکپتی بلوچستان ءَ ’ شمسر ( ھک آباد) ‘ نامیں میتگے ءَ وتی نزیکیں سیادانی کِر ءَ لڈ اتگ ءُ شتگ لھتے سال اِنت کہ ھمودان اَنت۔ پنچ شمبے ءِ روچ ءَ پاکستانی لشکر ءَ ارش کرتگ ءُ بی این ایم ءِ کلانھیں باسک چئیرمین دوستا گوں وتی سجھیں کھول ءَ کشتگ۔
آئی ءَ گْوشتگ کہ اے بلوچ راج ءِ سر ءَ پاکستان ءِ زوراکیانی بدتریں درورے۔ پاکستان ءَ میتگانی سر ءَ ھپت موشک آس داتگ کہ جتائیں ٹکاں کپتگ اَنت ءُ مزنیں کچے ءَ تباھی بیتگ۔ اے ارش ءِ آسر ءَ دہ بے میاریں مردم کشگ بیتگ کہ آ چہ پاکستانی لشکر ءِ زوراکیاں پہ وتی جان ءِ پھریز ءَ روکپتی بلوچستان ءَ شتگ اَنت کہ آیانی تہ ءَ جنین ءُ زھگ ھم ھوار اَنت۔ شھید بیتگیں مردمانی تہ ءَ دوست مھمد ء مھمود ( چیئرمین دوستا) آئی ءِ لوگ بانک شازیہ، آئی ءِ کسانیں سالیں زھگ : بابر دوست، ھانی دوست، چراگ دوست ءُ چہ پنجگور ءَ لڈ ءُ بار کرتگیں شھید یونس ءِ کھول مات نجمہ، کودکیں پرھاد ء مھمد جان ، ماھکان ءُ ماہ زیب ھوار اَنت۔
بی این ایم ءِ جارکش ءَ گْوشتگ ، جنین ءُ زھگانی شھید کنگ ءَ پد پاکستانی سرکار ءُ رسانکدر ھمے دروگ ءَ بندگ ءَ اَنت کہ پاکستانی لشکر ءَ ’ ایران ءِ پنجگور ارش‘ ءِ ترندیں پسو داتگ ءُ سرمچارانی بندر تباہ کرتگ اَنت، بلے راستی ءَ پاکستان ءَ میتگ نشانگ کرتگ اَنت۔ شھیدیں جنین ءُ زھگانی تامر ءُ اکس اے گپ ءِ گواہ اَنت۔ چئیرمین دوستا کہ آئی ءَ پاکستان اے ارش ءِ مستریں نشانگ گْوشگ ءَ اِنت دست ءُ گوشیں سیاسی کارکنے اَت کہ آ ماں چاگردی رسانکدر ءَ گوں وتی راستیں پجار ءَ سرگرم اَت ۔ اگاں آ سلاہ بندیں گلے ءِ کماندار بوتیں گڑا گوں وتی پجار ءَ چاگردی رسانکدر ءَ سھرا نہ بیتگ اَت۔
آئی ءَ گْوشتگ کہ اے ارش چہ وتی ترندی ءُ مزنیں کچے ءَ جنین ءُ زھگانی بیرانی ءِ رد ءَ الم ءَ بنداتی ویلے، بلے چہ ایشی ءَ پیش ھم بلوچ باھوٹی ھمساھگیں ڈیھ اوگانستان ءُ ایران ءِ پجیگ ءَ جھان ءِ آدگہ ڈیھانی تہ ءَ ھم پاکستان ءِ چیریں تْرامگیجانی کارمنداں کشتگ اَنت۔ بلوچ راجی زرمبشت ( بی این ایم ) یکشل ءَ گوں میان استمان ءَ لوٹ کنگ ءَ اِنت کہ روکپتی بلوچستان ءَ شتگیں مردماں میان استمان ءِ پارست ءَ باھوٹی بہ لیک ایت ءُ پہ آیانی زندمان ءِ پھریزگ ءَ گامگیج بہ زیر ایت۔
جارکش ءَ گْوشتگ ، پاکستان ءِ ارش ءِ سر ءَ بے تْرک ءُ نک بیگ ءِ جاہ ءَ پاکستان ءِ اے ناشریں کارروائی ءِ سر ءَ آ چہ میان استمان ءِ نیمگ ءَ جست کنگ بہ بیت۔ اے گپ رد کنگ نہ بیت کہ آئی ءَ پہ زانت میتگانی سر ءَ ارش کرتگ ءُ ھما مردم نشانگ کرتگ اَنت کہ آیاں گوں سلاہ بندیں جھد ءَ ھچ وڑیں ھمگرنچی نہ بیتگ۔ اے ارشاں سیاسی کارکنے ءَ ھوار جنین ءُ زھگ شھید کنگ بیتگ اَنت ءُ آیانی کوش ءِ زمہ واری پاکستان ءَ گوں پھر ءَ من اتگ۔
بی این ایم ءِ جارکش ءَ وتی درشان ءِ گڈی ءَ گْوشتگ کہ چہ پاکستان ءِ زوراکیاں سداں پارٹی ءِ باسکانی پجیگ ءَ بلوچ پہ وتی جان ءِ پھریزگ ءَ چہ وتی بیھی ھنکیناں لڈ اتگ ءُ روکپتی بلوچستان، اوگانستان، مزن ھور، یورپ، امریکا ءُ سرجمیں جھان ءَ جاہ منند اَنت۔ بلے میان استمانی تْرامگیجاں دنیگت بلوچ ’ باھوٹی‘ بستار ءَ نہ من اتگ اَنت پمیشکا بلوچ باھوٹ ءِ بستار ءَ وتی نامانی نبشتہ کنائینگ ءَ دلسیاہ اَنت ءُ چہ میان استمان ءِ نیمگ ءَ باھوٹی اگبالاں زبھر اَنت۔
