اسلام آباد ءَ بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی ءَبیست ءُ سے روچ سرجم بیتگ کہ انگت برجاہ اِنت۔ اے وھد ءَ بلوچ یکجھتی کمیٹی ءِ سروک سمی دین ھم زھرشانی ءَ ساڑی اِنت۔
اے بابت ءَ سمی دین ءِ گوشگ اِنت کہ مرچی جتائیں سیاسی کارکن، گل ءُ باسمائیں مردماں بھر زرتگ ءُ ھمدردی درشان کرتگ۔ ما ھمے اوست ءَ داریں کہ آدگہ سیاسی ءُ چاگردی کارکن، نودربر ءُ انسانی ھکانی پدجنوک دیم ءَ کاینت ءُ زھرشانی ءَ بھر زور اَنت مئے توار ءَ گیش مھکم کن اَنت ۔
آئی ءَ گوشتگ کہ اے زھرشانی ءِ بنیادی لوٹ دو اَنت بلوچستان ءَ انسانی ھکانی یکشلیں لگتمالی دارگ بہ بیتءُ بلوچ یکجھتی کمیٹی ءِ دزگیر بیتگیں سروک ءُ کارکن زوت یل کنگ بہ بنت۔ بلے چہ بد بھتی ءَ اے ھکی ئیں، پہ راھبند ءُ انسانی لوٹاں مرچی بیست ءُ سے روچ سرجم بیتگ، بلے چہ سرکار ءِ نیمگ ءَ انگت ءَ سنگینیں گامگیج زورگ نہ بیتگ۔ اے بے تواری نہ تھنا زوراکی ءَ کمک کنت، بلکیں پہ راجمستری واکاں جیڑگی گپے۔
