شال : زور بیگواھیں سدام ھسین ءِ لوگبانک رھیمہ بلوچ ءَ چہ وائس پار بلوچ مسنگ پرسن ءِ کیمپ ءَ پریس کانپرنس کرتگ ءُ گوشتگ کہ 18 ءُ 19 جولائی ءِ میانی شپ ءَ سی ٹی ڈی ءُ چیری ادارھانی کارمنداں شال پیز آباد ءَ مئے گس ءَ بیڑ برتگ ءُ منی لوگ واجہ سدام ھسین ء ابدرھیم منی چمانی دیم ءَ آوار جتگ ءُ گوں وت برتگ۔ لشکر ءَ گوں آئی ءَ ھوار منی ءُ منی لوگواجہ ءِ موبائل ھم پل اتگ ءُ برتگ اَنت۔
آئی ءَ گوشتگ کہ من وھدے جست کرتگ کہ منی لوگواجہ ءَ کج ءَ بر اِت آیاں گوشتگ ایشی سر ءَ گپ ھست جست ءُ پرس کن ایں ءُ پد ءَ یل کن ایں۔ بلے داں انوں آئی ھچ وڑیں ھال نیست ءُ ادارھانی کر ءَ بندیگ اِنت۔ من سے بر ءَ پہ ایپ آئی آر ءَ نزیکیں پولیس تانہ ءَ شتگ آں گڑا ایس ایچ او ءَ منی ایپ آئی آر نبشتہ نہ کرتگ۔
رھیمہ بلوچ ءَ گوشتگ کہ پد ءَ من سریاب پولیس تانہ ءَ شتگ آں اود ءَ ھم منی ایپ آئی آر نبیسگ نہ بیتگ۔ انگت ءَ منی لوگواجہ ءِ بابت ءَ سرپدی دیگ ھم نہ بیتگ، چہ ایشی ءَ منی سرجمیں کھول سسائی آزارانی دیمپان اِنت۔
آئی ءَ گوں اھوالکاراں دلگوش گور کرتگ ءُ گوشتگ کہ من گوں ڈیھ ءِ ادارھاں لوٹ کن آں کہ منی لوگواجہ ءِ سر ءَ چونیں بھتامے ھست گڑا دیم ءَ آرگ ءُ آمیدگس ءَ پیش کنگ بہ بیت ءُ آئی ءَ وتی بے میار پیش کنگ ءِ موہ دیگ بہ بیت۔ اگاں بے میار اِنت گڑا زوت یل کنگ بہ بیت۔
