شال: په زوربیگواهیں مردمانی پد جنگ ءَ وائس پار مسنگ پرسنز ( وی بی ایم پی ) ءِ برجاھیں زھرشانی گدان ءَ 5891 روچ سرجم بیتگ ۔
وی بی ایم پی ءِ ایگزیکٹو کمیٹی ءِ باسک نیاز نیچاری ءَ وتی شنگ کرتگیں درشانے ءَ گوشتگ که گنی بلوچ 27 مئی ءَ چه شال ءَ گوں المنیر کوچ ءَ دیم په کراچی ءَ سپر کنگ ءَ بیتگ که ھزدار ءَ ریاستی ادارھانی کارمنداں چه بس ءَ ایر گیپتگ ءُ دزگیر کنگ ءَ پد بیگواه کرتگ۔
آئی ءَ گوشتگ که گل گنی بلوچ ءِ کیس ءَ زوربیگواھیں مردمانی لڑ ءَ ھوار کنت ءُ سرکار ءِ کر ءَ هم پیش کنت ءُ گنی بلوچ ءِ کھول ءَ بلوچستان ءِ مزن آمیدگس ءَ هم بارت بلے انگت گنی بلوچ ءِ کیس ھچ وڑیں آمیدگس ءَ پیش کنگ نه بیتگ ءُ اے بابت ءَ آئی کھول ءَ ھچ وڑیں سرپدی دیگ نه بیتگ۔
نیاز نیچاری ءَ درشان ءِ گڈی ءَ چه گل ءِ نیمگ ءَ گنی بلوچ ءِ زوربیگواھی ءِ بگیری ءَ برجاهیں زھرشانی ءِ پله مرزی ءِ جار جتگ ءُ گوں زوربیگواھیں مردمانی کھول ، سیاسی ٹولی ءُ نودربر گلاں ھوار گوں شال ءِ مردماں لوٹ کرتگ که آ اے ایمنیں زھرشانی ءَ بھر بزور انت ءُ سانمندیں کھول ءِ توار جوڑبه بنت ءُ په گنی بلوچ ءِ یل کنگ ءَ وتی کرد ءَ پیلو به کن اَنت۔
