اسلام آباد ءَ بلوچ یکجھتی کمیٹی ءِ زھرشانی نندانک ءِ سروک ڈاکٹر ماہ رنگ ءَ ماں چاگردی رسانکدر ایکس ءَ اوتل ءَ پاکستانی لشکر ءِ تیرگواری ءَ ڈرائیور ءِ بیرانی ءِ پژدر ءَ نبشتگ کہ مرچی پد ءَ یک بلوچ ڈرائیورے کشگ بوت ءُ مرچی پد ءَ بلوچ گدانے پرسیگ بوت۔
آئی ءَ گوشتگ کہ مرچی سھب ءَ اوتل ءِ پہ زر گرگ ءَ کوسٹ گارڈ ءَ یک بلوچ ڈرائیورے کشتگ۔ مئے زھرشانی ھمے چکچینی ءِ بگیری ءَ اِنت کہ نہ بلوچ ءِ مزور پھریز اَنت نہ سیاسی کارکن، نہ زھگ ءُ جنین ھمک بھرگ ءِ مردم ریاستی زوراکیانی آماچ اِنت۔
ڈاکٹر ماہ رنگ ءَ گوشتگ کہ اے ڈرائیور مزوری کن اَنت ءُ وتی زھگانی لاپ ءَ والین اَنت، بلے اے ریاست ھمے مزوراں اوپار کرت نہ کنت ءُ ھمک روچ بلوچ ڈرائیور گوں ھمے وڑیں ویلاں کشگ بنت۔
آئی ءَ گوشتگ کہ اے بلوچ ڈرائیورانی اولی ویل نہ اِنت ایشی پیش پروم پنجگور زامران، دشت واشک، دالبندین، نوکنڈی، سوراب ءَ ھوار جتائیں ھنداں باز ڈرائیور ریاستی لشکر ایپ سی ءُ کوسٹ گارڈ ءِ نیمگ ءَ ناھک ءَ کشگ بوتگ۔
ڈاکٹر ماہ رنگ ءَ گوشتگ کہ بلوچ ڈرائیور بے کس نہ اَنت آیاں ریاستی لشکر ھمک روچ ناھک ءَ کشگ ءَ اَنت، ما گوں وتی ڈرائیوراں اوشتاتگیں گوں آیاں کانودی جنگ ءَ مڑ ایں۔
