میان استمانی انسانی ھکانی ادارہ ایمنسٹی انٹرنیشنل ءَ چہ پاکستان سرکار ءَ بلوچ یکجھتی کمیٹی ءِ سروک ڈاکٹر ماہ رنگ بلوچ، بیبرگ بلوچ، سبگت اللہ شاہ جی، بیبو بلوچ ءُ گلزادی بلوچ ءِ زوتیں آجوئی ءِ لوٹ کرتگ۔
آئی ءَ گوشتگ کہ اے درسیں مردم پر ایمنیں جھد ءُ پہ انسانی ھکاں توار چست کنگ ءِ میار ءَ دزگیر کنگ بیتگ اَنت اے میان استمانی ءُ ڈیھ ءِ کانود ءِ تچک ءَ بگیری اِنت۔ آیانی دزگیری بلوچستان ءَ برجاھیں ریاستی زوراکیانی بھر اِنت کہ ایشی مول پر ایمنیں زھرشانی، گپ ءِ آجوئی ءُ سیاسی سرگرمیانی دارگ اِنت۔
آئی ءَ گوشتگ کہ اے سروک داں سے ماہ ءَ تھری ایم پی او ءِ رد ءَ بندیگ کنگ ءَ پد انوں ناشرکاری ءِ گِر ءُ داریں آمیدگس ءَ پیش کنگ بیتگ اَنت، اود ءَ آیانی سر ءَ ناشرکاری ءِ بھتام جتگ ءُ زندانی کرتگ اَنت۔
ایمنسٹی انٹر نیشنل ءَ وتی رپورٹ ءَ ترس پدر کرتگ کہ اے مردماں بندیگجاہ ءَ درمان ءِ آسراتی دیگ بوگ ءَ نہ اِنت ءُ آ گوں ناروائیں رویشت یا ترسناکیں آزارانی دیمپان اَنت۔
آئی ءَ گوشتگ کہ ناشرکاری ءِ گر ءُ دار ءُ مھلوک ءِ راہ ءُ راھبند ءِ بابت ءَ راھبند ءَ سیاسی کارکنانی بگیری ءَ چو سلاہ ءِ پیم ءَ کارمرز کنگ ءَ اَنت۔ اے انسانی ھکانی بنیادی بگیری اِنت۔
ایمنسٹی انٹر نیشنل ءَ گوں میان استمانی انسانی ھکانی کارکن ءُ سول سوسائٹی ءَ لوٹ کرتگ کہ آ پاکستان سرکار ءَ زور بدے اَنت دانکہ بلوچ سروکانی زوتیں یل کنگ ءُ بلوچستان ءَ شھریانی آجوئی ءِ شرپ ءِ سر ءَ دلجمی دیگ بہ بیت۔
