کراچی: بلوچ یکجھتی کمیٹی ءِ کارکن ءُ زوربیگواھیں ڈاکٹر دین مھمد ءِ جنک سمی دین ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ ڈاکٹر ماہ رنگ بلوچ تھنا یک نامے نہ اِنت یک ارادھے، یک توارے ءُ یکشلیں گھگیری ءِ چیدگ اِنت۔ آئی نہ تھنا زوراکانی تھارونکی ءَ چراگ بالینتگ۔ بلکیں ھمک زھگ، ورنا ءُ کماشانی دل ءَ توکل ءِ رژنائی بھر کرتگ۔
سمی دین ءَ گوشتگ کہ ماہ رنگ ءِ سوچ، آئی لیکہ، آئی توار درس بندیگ کنگ نہ بنت۔ زندان ءِ دیوال آئی جند ءَ داشت کن اَنت، بلے آئی لیکہ ءَ نہ کہ آ ھمک نزورءَ دپءَ اِنت ءُ ھمک نہ منوک ءِ توار ءَ بندوک اِنت۔
آئی گوشتگ کہ ھمایاں کہ ماہ رنگ بلوچ ءُ آئی سنگت بندیگ کرتگ اَنت۔ آیانی سر ءَ زندان ءُ اے جنجال آرتگ اَنت۔ بلے آیانی پگر گوں زمزیلاں بندگ نہ بیت۔ ماہ رنگ نوں یک مردمے نہ اِنت آ یک زرمبشتے جوڑ بوتگ ءُ زرمبشت پہ زندان ءَ بند کنگ ءَ ھلاس نہ بنت۔ بلکیں آ گیش مھکم بنت ءُ گیش تالان بنت ءُ مھلوک ءَ باسما کن اَنت۔
