بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ درسیں نشانگاں سوبمند بیتگ ءُ آپریشن بام آسر بیتگ۔
آئی ءَ گوشتگ کہ بی ایل ایپ ءَ برجاھیں آپریشن ءَ سرجم ءَ ھشتاد ءُ چار ارش کرتگ۔ چہ ایشی ءَ پاکستانی پوج ءُ ریاستی ادارہ جتائیں جنگاں تاوان داتگ اَنت۔ اے کاروائیاں ایپ سی ءُ آرمی ءِ کم چہ کم پنجاہ کارمند مرتگ ءُ پنجاہ ءُ یک ءَ گیش ٹپی بیتگ، چیریں ادارھانی نُھ کارمند کشتگ۔
جارکش ءَ گوشتگ کہ آپریشن ءِ میان ءَ ھپت موبائل ٹاور گوں مشین ءُ ساماناں ستکگ ءُ جتائیں جاھاں دگ بستگ اَنت۔ مادن ءُ گیس بروکیں گاڑیاں ھوار 25 گاڑی تباہ کرتگ۔ نزام ءِ چاروک نشانگ کرتگ اَنت ءُ پنچ ءَ گیش سرویلنس ڈرون کیمرہ ءُ کواڈ کاپتر تباہ کرتگ، یک بینکے مانداشتگ، سرکاری بس تاوان داتگ۔
آئی ءَ گوشتگ کہ ارشانی میان ءَ سی ءَ گیش ارش تچک ءَ آرمی ءُ ایپ سی ءِ سر ءَ کرتگ، دو ارشاں چیریں ادارہ ( ایم آئی ) ءُ آئی ایس آئی ءِ سر ءَ چار ارش، یکے کسٹم، یکے کوسٹ گارڈ، چار لیویز چوکی، چار ارشاں پولیس نشانگ کرتگ۔ جتائیں کاروائیانی میان ءَ چار ءَ گیش جاہ ءَ سلاہ پل اتگ اَنت۔یک جاھے ءَ بینک ءِ پھازدارے ءِ سلاہ پل اِتگ ۔
جارکش ءَ گوشتگ کہ اے آپریشن بی ایل ایپ ءِ مھکمیں لشکری کاراں پیش دار ایت، ایشی مول ریاستی زورگپتی، پوج ءِ ساڑی بوگ ءُ پہ لٹ ءُ پلی نزام ءَ چیلنج اِنت۔
آئی ءَ گوشتگ کہ اے آپریشن ءِ میان ءَ بلوچ سرمچاراں مکران، رکشان، کولواہ، سراوان، جھلاوان، کوہ ءِ سلیمان، بیلہ ءُ کچی ءَ ترندیں کاروائی کرتگ ءُ زورگریں ریاست پاکستان ءِ نوک آبادکاری انتزام ءُ مشینری نادزرس کرتگ اَنت۔ آپریشن بام نہ تھنا بی ایل ایپ ءِ جنگی کارشونی ءِ مٹی ءُ اے بودناکیانی گیش کنگ ءُ پہ راجی آجوئی ءَ مھکمیں ارادہ ءَ پیش دار ایت، بلکیں پہ بلوچ راجی آجوئی زرمبشت ءَ نوکیں گامگیجے۔
جارکش ءَ گوشتگ کہ آپریشن بام ءِ رد ءَ بی ایل ایپ ءَ زورگریں ریاست پاکستان ءَ ھمے کلوہ داتگ کہ بلوچستان ءِ سر ءَ اے زورگپتی ءُ نوک آبادکاریں لٹ ءُ پلانی روچ ھسابی اَنت۔ زورگریں ریاست نہ گوں زور ءُ زوراکی ءَ وتی زورگپتی ءَ داشت کنت ءُ نہ پندل ءُ میڑینگ ءُ سرکاری کنگ ءِ پالیسی، اسلامی سیادی براتی ءِ مناپکی تبلیگ ءُ دروگیں راجمستری ءُ وتگڑیں پارلیمانی دروگانی رد ءَ بلوچ راج ءَ گیشتر رد دات کنت۔ پاکستان ءِ نام ءِ سر ءَ پنجاپی ءِ ناشریانی راستیاں بلوچ راج شریں وڑے ءَ سرپد اِنت۔
آئی ءَ گوشتگ کہ ما زورگریں ریاست پاکستان ءُ پنجاپی سرکار ءَ تچک ءَ گوش ایں کہ بلوچستان ءَ نوں گیشتر دروگ بندگ ءَ سوبین نہ بہ ئے بلکیں بلوچستان ءِ سر ءَ زورگپتی ءِ برجاہ دارگ ءَ چہ پنجاپی ءِ کوشستاں تھنا ھونریچی بیت۔ پنجاپی سرکار ءُ آئی منوگریں پنجاپی کواس ءُ مھلوک بلوچستان ءِ آجوئی ءَ بہ من ایت ءُ چہ بلوچستان ءِ سر ءَ وتی زورگپتی ءِ ھلاس کنگ ءِ پیسلہ ءَ ھمنچو وھد جن اَنت آیاں ھمنچو گیش ایشی نھاد پیلو کنگ لوٹ ایت۔
میجر گھرام بلوچ ءَ وتی درشان ءِ گڈی ءَ گوشتگ کہ آپریشن بام بی ایل ایپ ءَ 9 جولائی ءَ بندات کرتگ ءُ داں یازدہ جولائی ءِ شپ ءَ برجاہ بیتگ۔ اے میان ءَ بلوچ سرمچارانی بلوچستان ءَ کاروائیانی لڑ شنگ کرتگ۔
