اکوام متھدہ ءِ انسانی ھکانی پتر ءِ 59 می نیاد ءِ درگت ءَ گل ءِ سرکماش ڈاکٹر نسیم ءِ سروکی ءَ بلوچ نیشنل ( بی این ایم ) ءِ بولکے ءَ ، ماں جنیوا ءَ انسانی ھکانی ادارہ ءُ جنگی دمگاں سرگرمیں میان راجی گلانی جھگیراں گندک کرتگ۔
بی این ایم ءِ بولک ءَ گل ءِ دری کارانی کارگشاد پھیم ءُ راھوتکار نیاز ھوار بیتگ اَنت۔ بولک ءَ گوں تبتی کارگس ، ریڈ کراس ءِ میان راجی پتر ( آئی سی آر سی ) ءُ دگہ تْرامگیجانی سروکاں گند ءُ نند کرتگ۔
بی این ایم بولک ءِ ھم گْوریں نیادانی تہ ءَ بھر زیرگ ، بلوچستان ءِ جیڑہ ءِ سر ءَ گپ
بی این ایم ءِ بولک ءَ اکوام متھدہ ءِ بازیں ھم گْوریں نیاداں ھم بھر زرتگ ، چوش کہ میان راجی تک ءَ میارانی گر ءُ دار ءِ آمیدگس ( آئی سی سی ) ءُ یو این سی ایچ آر ءِ مردماں پہ زور لڈ ءُ بار کنائینگ ءُ دارنڈیھی ءِ بنگپانی سر ءَ برجم دارگ بیتگیں ھم گْوریں نیاداں بی این ایم ءِ نام گپتگیں سروکاں بھر زرتگ ۔ اے سرگرمیانی میان ءَ بولک ءَ بلوچستان ءَ آجوئی ءِ زْرمبشت ، پاکستان ءِ زورگری ءِ پد ءَ ودی بیتگیں مردمی ویل ءُ زورگری ءِ دمگ ءِ سر ءَ سانانی رد ءَ سانمندیں سپارتی راھوت جوڑکرتگ۔
میان راجی وکیلاں گندگ ، پاکستان ءِ سر ءَ جھانی آمیدگس ءَ کیس ءِ درگت ءَ سوڑگ
بولک ءَ گوں میان راجی وکیلاں ھم گندک کرتگ ، اے گند ءُ گدار ءَ بی این ایم ءِ سروکاں جھانی راھبند ءُ انسانی ھکانی پد ءَ پاکستان ءُ آئی ءِ واکدارانی بگیری ءَ میارانی گر ءُ دار ءِ میان راجی آمیدگس ءَ کیس کنگ ءِ بارہ ءَ دلجمی ءَ گپ ءُ تران کرتگ۔
گوں دلائی لامہ ءِ جھگیر ءَ گندک ، وت ماں وتی سیتانی سر ءَ گپ
بولک ءَ ماں سوئزرلینڈ ءَ تبتی دینی راھشون دلائی لامہ ءِ جھگیر ءُ تبتی کارگس ءِ سروک تن لے چوکی ءَ گوں گند ءُ نند کرتگ۔ اے گند ءُ گدار ءَ وت ماں وتی سیتانی سر ءَ گپ بیتگ ءُ دوئیں راجانی جھگیراں دیمتر ءَ پجیگ ءَ جھد ءُ یک ءُ دومی ءِ سفارتی کمک کنگ ءِ سر ءَ ھم پتی درشانتگ۔
بی این ایم ءِ اے درسیں راھوتکاری ءُ گند ءُ گدارانی مول گل ءِ برجاھیں سپارتی شوندات ءِ دیم ءَ برگ اِنت ، اے رد ءَ بی این ایم ءِ جھگیر ماں سرجمیں جھان ءَ پہ بلوچستان ءِ آجوئی ءِ زْرمبشت ءَ پلہ مرز ودی کن اَنت ءُ بلوچستان ءِ تہ ءَ پاکستان ءِ کرتگیںانسانی ھکانی بگیریاں جھانی تک ءَ سھرا کن اَنت۔
